ಸರಪಳಿಗಳು

ನಮ್ಮ  ಹುಟ್ಟು ಇಲ್ಲ
ನಮ್ಮ ಕೈಯ್ಯಲ್ಲಿ
ತಂದೆ ತಾಯಿ ಮನೆತನವೆಂಬ
ಸರಪಳಿಗಳು ಬಿಗಿದವು
ಕಣ್ಣು ತೆರೆದು ನೋಡುತ್ತಲೇ

ದೊರೆತ ದೇಹದ ಆಯ್ಕೆಯಿಲ್ಲ
ನಮ್ಮ ಕೈಯ್ಯಲ್ಲಿ
ದೈಹಿಕ ನ್ಯೋನತೆಗಳೆಂಬ
ಸರಪಳಿಗಳು ಬಿಗಿದವು
ಮೊದಲ ಹೆಜ್ಜೆ ಇಡುತ್ತಲೇ

ನಾವುಂಡ ಊಟ ಇರಲಿಲ್ಲ
ನಮ್ಮ ಕೈಯಲ್ಲಿ
ಆಹಾರದ ದೋಷಗಳ
ಸರಪಳಿಗಳು ಬಿಗಿದವು
ಮೊದಲ ತುತ್ತು ತಿನ್ನುತ್ತಲೇ

ನಾವು ಬೆಳೆದ ವಾತಾವರಣ
ಇರಲಿಲ್ಲ
ನಮ್ಮ ಕೈಯಲ್ಲಿ
ಮಾನಸಿಕ ದೋಷಗಳ
ಸರಪಳಿಗಳು ಬಿಗಿದವು
ಮೊದಲ ಆಟ ಆಡುತ್ತಲೇ

ಕಲಿತ ಶಾಲೆ ಓದಿದ ಪುಸ್ತಕಗಳು
ಇರಲಿಲ್ಲ
ನಮ್ಮ ಕೈಯಲ್ಲಿ
ಅಜ್ಞಾನದ
ಸರಪಳಿಗಳು ಬಿಗಿದವು
ಮೊದಲ ಪಾಠ ಕಲಿಯುತ್ತಲೇ

ಸಿಕ್ಕ ಮೊದಲ ಕೆಲಸ
ಆದ ಮದುವೆ
ಇರಲಿಲ್ಲ ಹೆಚ್ಚಿನ ಆಯ್ಕೆ
ನಮ್ಮ ಕೈಯಲ್ಲಿ
ಸಂಸಾರದ
ಸರಪಳಿಗಳು ಬಿಗಿದವು
ಸ್ವಾತಂತ್ರದ ಕಿಟಕಿ ತೆರೆಯುತ್ತಲೇ

ಮಾಡ ಬೇಕಾದ ಕೆಲಸ
ಕೆಲಸದ ರೀತಿ ಸಮಯ
ಇರಲಿಲ್ಲ ಆಯ್ಕೆ
ನಮ್ಮ ಕೈಯಲ್ಲಿ
ಸಂಬಳದ
ಸರಪಳಿಗಳು ಬಿಗಿದವು
ಸಾಲದ ಖಾತೆ ತೆರೆಯುತ್ತಲೇ

ನಾಲ್ಕು ದಶಕಗಳೇ
ಕಳೆದವು ಈ ಸರಪಳಿಗಳ
ಬಂಧನದಲಿ
ಆದರಿನ್ನೂ ಹಾಗಲ್ಲ
ಕಳಚಿದೆ ಒಂದೊಂದೇ ಸರಪಳಿ
ಉಸಿರಾಡಬೇಕಿದೆ
ನಡೆಯಬೇಕಿದೆ ಓಡಬೇಕಿದೆ
ಎಲ್ಲಕಿಂತ ಹೆಚ್ಚಾಗಿ
ಮುಕ್ತವಾಗಿ ಬದುಕಬೇಕಿದೆ

 - ಬುಡ ಬುಡ್ಕಿ ಬಾಬಾ