ಅರ್ಥ

ಜೀವನದ
ಪ್ರತಿ
ಕ್ಷಣಕೂ
ಅರ್ಥ
ತುಂಬುವ
ತವಕದಲಿ
ಅವನ
ಜೀವನವೆ
ಅರ್ಥಹೀನ
ಆಗಿದ್ದು
ಅವನ
ಅರಿವಿಗೆ
ಬರಲೇ
ಇಲ್ಲ
 - ಬುಡ ಬುಡ್ಕಿ ಬಾಬಾ

ಇರಬೇಕು

ಮನದ ಸಮುದ್ರದಲಿ ಎದ್ದ
ಚಂಡಮಾರುತಕೆ ಹೋಗಿ
ಬಿದ್ದಿದ್ದೆ ಅದ್ಯಾರು ಇಲ್ಲದ
ಮರಳುಗಾಡಿನಂತ ನಡುಗಡ್ದೆಯಲಿ
ಸುತ್ತಲೂ ತುಂಬಿತ್ತು ಕಗ್ಗತ್ತಲು
ತೆರೆಗಳ ಕೊರೆತಕಿಂತ ಹೆಚ್ಚಾಗಿತ್ತು
ಹಸಿವಿನ ಕೊರೆತ
ಮನದಾಳದಲ್ಲಿ ಅಡಗಿದ್ದ
ನೋವೆಂಬ ಗಡ್ಡೆ ಗೆಣಸುಗಳ
ತಗೆದೆ ಅಗಿದಗಿದು
ಕಮರಿದ ಕನಸುಗಳ
ಉರವಲು ಕೂಡಿಸಿ
ಹಚ್ಚಿದೆ ಬೆಂಕಿ
ಅವಮಾನಗಳ ರೋಷದಿಂದ
ಬುಗಿಲೆದ್ದು ಉರಿಯಿತು ಬೆಂಕಿ
ಬೆಂದವು ನೋವುಗಳೆಂಬ ಗಡ್ಡೆ
ಗೆಣಸುಗಳು ಕ್ಷಣಮಾತ್ರದಲಿ
ಹೊಟ್ಟೆ ತುಂಬಾ ತಿಂದು
ತೇಗಿ ಮಲಗಿದೆ ಹಾಯಾಗಿ
ಅನಿಸಿತಾಗ ಇರಬೇಕು
ಜೀವನದಲಿ ನೋವು
ನನಸಗಾಗದ ಕನಸುಗಳು
ಅವಮಾನಗಳು ಕೂಡ
 - ಬುಡ ಬುಡ್ಕಿ ಬಾಬಾ

ಅಷ್ಟೇ

ಹೇಳಿಲ್ಲ ಜೀವನಕೆ ಕೊಡಬೇಡ ನನಗೆ ಕಷ್ಟ ನಷ್ಟಗಳನು ಎಂದು
ಹೇಳಿಲ್ಲ ಜೀವನಕೆ ಕೊಡಬೇಡ ನನಗೆ ದುಃಖ ದುಮ್ಮಾನಗಳನು ಎಂದು
ಹೇಳಿಲ್ಲ ಜೀವನಕೆ ಕೊಡಬೇಡ ನನಗೆ ಅಡ್ಡಿ ಆತಂಕಗಳನು ಎಂದು
ಹೇಳಿಲ್ಲ ಜೀವನಕೆ ಕೊಡಬೇಡ ನನಗೆ ದುರಾದೃಷ್ಟಗಳನು ಎಂದು
ಹೇಳಿಲ್ಲ ಜೀವನಕೆ ಕೊಡಬೇಡ ನನಗೆ ಕಠಿಣ ಸವಾಲುಗಳನು ಎಂದು
ಹೇಳಿಲ್ಲ ಜೀವನಕೆ ಕೊಡಬೇಡ ನನಗೆ ದುಷ್ಟ ದುರುಳರ ಜೊತೆ ಹೋರಾಟವನು ಎಂದು
ಹೇಳಿದ್ದು ಒಂದೇ ನನ್ನ ಪರೀಕ್ಷಿಸಿ ನೋಡುವ ಭರದಲಿ ಮರೆಯದಿರು
ಆಗಾಗ ವಿರಮಿಸಿ ನಿನ್ನ ಆರೋಗ್ಯದ ಬಗ್ಗೆಯೂ ಗಮನ ಕೊಡುವುದನು ಎಂದು ಅಷ್ಟೇ
- ಬುಡ ಬುಡ್ಕಿ ಬಾಬಾ

ಹೇಳಲಾರೆ

ನಾನು ಪಂಡಿತನಲ್ಲ
ನನಗಿಲ್ಲ ಯಾವುದರಲ್ಲೂ
ತಲಸ್ಪರ್ಶಿ ಜ್ಞಾನ
ನೀವು ಕೇಳಿದರೆ ನನಗೆ
ನೀ ಬಂದಿದ್ದು ಎಲ್ಲಿಂದ? ಗೊತ್ತಿಲ್ಲ
ನೀ ಹೊರಟಿದ್ದು ಎಲ್ಲಿಗೆ? ಗೊತ್ತಿಲ್ಲ
ಹುಟ್ಟೇ೦ದರೇನು ? ಗೊತ್ತಿಲ್ಲ
ಸಾವೆಂದರೇನು? ಗೊತ್ತಿಲ್ಲ
ನೀ ಮನುಷ್ಯನಾಗಿ ಹುಟ್ಟಿದ್ದೇನೋ ಸರಿ
ನೀ ಮತ್ತೆ ಮನುಷ್ಯನಾಗಿ
ಹುಟ್ಟುವ ರೀತಿ ಬಾಳುತಿರುವೆಯಾ?
ಉತ್ತರ ಗೊತ್ತಿದೆ ಆದರೆ ಹೇಳಲಾರೆ
- ಬುಡ ಬುಡ್ಕಿ ಬಾಬಾ

ಸತ್ಯ ಸುಳ್ಳು ಅರ್ಧ ಸತ್ಯ

ಸತ್ಯ ಸುಳ್ಳು ಅರ್ಧ ಸತ್ಯದ
ನಡುವೆ ಏರ್ಪಡಿಸಿದ್ದರಂತೆ
ಓಟದ ಸ್ಪರ್ಧೆಯೊಂದನ್ನು || ೧ ||

ಸತ್ಯ ಆಟದ ಬಗ್ಗೆಯ ಶ್ರದ್ಧೆಯಿಂದ
ಪೂರ್ಣ ಬಲ ಪ್ರಯೋಗಿಸಿ
ಓಡಿತಂತೆ ಕೊನೆ ಗೆರೆಯವರೆಗೆ
ಸುಳ್ಳು ಓಡುವುದೆಲ್ಲ ಬಿಟ್ಟು
ನೆರೆದವರಿಗೆ ಹಂಚಿತಂತೆ
ಸವಿಯನ್ನು ತಾನೇ ಗೆದ್ದಿರುವಂತೆ
ಅರ್ಧ ಸತ್ಯ ಓಟದ
ನಿಯಮಗಳ  ಅಸ್ಪಷ್ಟತೆಯ
ದುರ್ಬಳಕೆ ಮಾಡಿ ಓಡಿ
ದಾಟಿತಂತೆ ಕೊನೆ ಗೆರೆ
ಸತ್ಯಕಿಂತ ಮೊದಲು || ೨ ||


ಸತ್ಯ ಸಾತ್ವಿಕ ಸಿಟ್ಟಿನಿಂದ ಹೇಳಿತಂತೆ
ಸುಳ್ಳು ಓಡದೆಯೆ ಗೆದ್ದೇ ಎಂದು ಬೀಗುತಿದೆ
ಅರ್ಧ ಸತ್ಯ ನಿಯಮಗಳ ಮುರಿದರೂ
ಕಾಣದಂತೆ  ದುರ್ಬಳಕೆ ಮಾಡಿದೆ
ಎಂದು ಸಾರಿ ಸಾರಿ
ಆದರೇನು ಸುಳ್ಳಿನ ಸವಿಯುಂಡ
ಜನರಿಗೆ ರುಚಿಸಲಿಲ್ಲವಂತೆ ಸತ್ಯದ ಕಹಿ || ೩ ||

ಸುಳ್ಳಿಗೇಕೋ ತನ್ನ ಗೆಲುವು ಅನುಮಾನವಾಗಿ ಕಂಡು
ಸತ್ಯದ ತಲೆಯ ಮೇಲೆ ಹೊಡೆಯಲು
ಅರ್ಧ ಸತ್ಯದ ಕಡೆಗೆ ನೋಡಿತಂತೆ
ಅದ ಕಂಡ ಅರ್ಧ ಸತ್ಯದ ಬಲ ಹೆಚ್ಚಿ
ಬಲು ಗಂಭೀರವಾಗಿ ನುಡಿಯಿತಂತೆ
ಸುಳ್ಳು ಓಡದಿದ್ದನ್ನು ನಾ ನೋಡಿಲ್ಲ
ಸತ್ಯ ಕೊನೆ ಗೆರೆ ದಾಟಿದ್ದನ್ನು ನಾ ನೋಡಿಲ್ಲ
ನಾ ಕೊನೆ ಗೆರೆ ದಾಟಿದ್ದು ಮಾತ್ರ ಸತ್ಯ || ೪ ||

ಇದ  ಕೇಳಿದ ಜನ ಅಂದರಂತೆ
ಸತ್ಯಕ್ಕೆ ನೋಡಿ ಕಲಿ ಇದು ಸಭ್ಯತೆ
ಅರ್ಧ ಸತ್ಯಕ್ಕೆ ಮೊದಲ ಸ್ಥಾನ
ಸುಳ್ಳಿಗೆ ಎರಡನೆಯ ಸ್ಥಾನ
ಸತ್ಯದ ಅಸಭ್ಯ ನಡತೆಗೆ
ಅದನು ಸ್ಪರ್ಧೆಯಿಂದ
ವಜಾಗೊಳಿಸುವ ಸಜೆಯಂತೆ
ಅದ ಕಂಡ ಅರ್ಧ ಸತ್ಯ ಸುಳ್ಳಿನ
ಕೈ ಕುಲುಕಿ ಕಣ್ಣು ಮೀಟಿಸಿದ್ದು
ಮಾತ್ರ ಯಾರಿಗೂ ಕಾಣಲಿಲ್ಲವಂತೆ  || ೫ ||
- ಬುಡ ಬುಡ್ಕಿ ಬಾಬಾ

ಅರ್ಥಪೂರ್ಣತೆ

ಅರ್ಥಪೂರ್ಣತೆಯ ಅರಿತು
ಅರ್ಥಹೀನತೆಯ ಅನವರತ ದಾಳಿಗಳ
ಕೆಲ ಬಾರಿ ತಡೆದು
ಕೆಲ ಬಾರಿ ತಪ್ಪಿಸಿಕೊಂಡು
ಕೆಲ ಬಾರಿ ಎದುರಿಸಿ
ಬದುಕುವದು ಅದೆಷ್ಟು ಕಷ್ಟ

- ಬುಡ ಬುಡ್ಕಿ ಬಾಬಾ

ಭ್ರಮೆ

ಎಲ್ಲರ ಪ್ರೀತಿಸಬೇಕು
ಎಲ್ಲರೂ ನನ್ನ ಪ್ರೀತಿಸಬೇಕು
ದಾರಿ ಸರಳವಾಗಿರಬೇಕು
ಎಂಬ ಭ್ರಮೆಯ ಪಂಜರದಿಂದ
ಹೊರಗೆ ಬಂದಾಗ
ಶುಭ್ರ ಸರೋವರದಲ್ಲಿ
ಸೂರ್ಯ ಪ್ರತಿಫಲಿಸುತಿದ್ದ
ಆಕಾಶ ನೀಲಿಯಾಗಿತ್ತು
ತಂಗಾಳಿ ಬೀಸುತಿತ್ತು
ಕಣ್ಣ ಮುಂದೆ ಇದ್ದರೂ
ಕಾಣದಂತಿದ್ದ ದಾರಿ
ಹೆದ್ದಾರಿಯಂತೆ ಗೋಚರಿಸುತಿತ್ತು
ಕಾಲಲ್ಲಿ ಹತ್ತಶ್ವಗಳ ಕಸು ತುಂಬಿತ್ತು
ಮನ ಆನೆಯಂತೆ ತಾನು
ಎಲ್ಲದಕ್ಕೂ ಸೈ ಎಂದು
ಶಂಖನಾದ ಮೊಳಗಿಸಿತ್ತು
- ಬುಡ ಬುಡ್ಕಿ ಬಾಬಾ