ಕಾಣಬೇಕಿದೆ

ಎಲ್ಲಿಂದಲೂ ಎಲ್ಲಿಗೂ ಹೋಗದ
ಯಾವದನ್ನೂ ಯಾವುದಕ್ಕೂ ಸೇರಿಸದ
ಒಳ ಹಾದಿ ಹಿಡಿದು
ಗುರುತಿಲ್ಲದ ಊರೊಂದು ತಲುಪಿ
ಹೆಸರಿಲ್ಲದ ರಸ್ತೆಯಲಿ
ಪರಿಚಯವಿಲ್ಲದ ಜನರಲ್ಲಿ
ನನಗರಿವಿಲ್ಲದೆ ಕಳೆದುಕೊಂಡು
ಕಾಣಬೇಕಿದೆ ನನ್ನನು ನಾನು

- ಬುಡ ಬುಡ್ಕಿ ಬಾಬಾ

ಆಯ್ಕೆ

ಪಾಲಕರೆ ನೆನಪಿಡೋಣ
ಇರಲಿಲ್ಲ ನಮ್ಮ ಮಕ್ಕಳಿಗೆ
ಆಯ್ಕೆ ಅವರೆಲ್ಲಿ ಹುಟ್ಟುವರೆಂದು
ಆದರೆ
ಅವರನು ಬೆಳೆಸೋಣ
ಅವರೊಡಗೂಡಿ ಬೆಳೆಯೋಣ
ಅವರೊಡನೆ ಬೆರೆಯೋಣ
ಹೀಗೆ
ಆಯ್ಕೆ ಇದ್ದಿದ್ದರೆ ನಾನು
ಇಲ್ಲೇ ಹುಟ್ಟುತಿದ್ದೆ  ಎಂದು 

ಅವರನ್ನುವ ಹಾಗೆ

- ಬುಡ ಬುಡ್ಕಿ ಬಾಬಾ

ಜೀವನದ ಆಯವ್ಯಯ

ಮಾಡಿದರೆ ಸಾಕೆ ಬರೀ
ದುಡ್ಡಿನ ಬಗ್ಗೆ ಲೆಕ್ಕಾಚಾರ
ದುಡ್ಡಿನ ಬಗ್ಗೆ ಯೋಜನೆ
ಮಾಡುವುದು ಬೇಡವೇ
ವಿನಿಯೋಗಿಸಿದ ಪ್ರತಿ ಉಸಿರಿನ ಲೆಕ್ಕಾಚಾರ
ನೆನಪಿಡಿ ಕೊನೆಗೆ ಲೆಕ್ಕ ಒಪ್ಪಿಸಬೇಕಾಗಿದ್ದು
ರೂಪಾಯಿ ಡಾಲರು ಪೌಂಡು ಯೆನ್ನುಗಳಲ್ಲಿ ಅಲ್ಲ
ಜೀವನದ ಆಯವ್ಯಯ ಒಪ್ಪಿಸಬೇಕಿದೆ
ನಾವು ವಿನಿಯೋಗಿಸಿದ ಪ್ರತಿ ಉಸಿರುಗಳಲ್ಲಿ
- ಬುಡ ಬುಡ್ಕಿ ಬಾಬಾ

ಕೂಲಿಯಾಳು

ಹೇಳಿ ಯಾರು ಹೊತ್ತಿಲ್ಲ
ಭಾರಗಳನು
ಜೀವನದ ಪಯಣದಲಿ? || ೧ ||

ಎಲ್ಲರ ಚೀಲವು ಭಾರವೇ
ತುಂಬಿವೆ ಅವುಗಳಲಿ
ನಮ್ಮ ನೋವುಗಳ ಭಾರ
ನಮ್ಮ ಸೋಲುಗಳ ಭಾರ
ನಮ್ಮ ಭಯಗಳ ಭಾರ
ನಮ್ಮ ಆತಂಕಗಳ ಭಾರ
ನಮ್ಮದೇ ನ್ಯೂನತೆಗಳ ಭಾರ
ನಮ್ಮ ಆಸೆಗಳ ಭಾರ
ನಮ್ಮ ಮಹತ್ವಾಕಾ೦ಕ್ಷೆಗಳ ಭಾರ
ನಮ್ಮ ನಿಟ್ಟುರಿಸಿನ ಭಾರ
ನಮ್ಮ ಭ್ರಮೆಗಳ ಭಾರ
ನಮ್ಮ ನಂಬಿಕೆಗಳ ಭಾರ
ಅದೆಲ್ಲವ ಮೀರಿದ ಮಣಭಾರ
ನಾನು ನಾನೆಂಬ ಭಾರ || ೨ ||

ಅದೆಲ್ಲ ಇರಲಿ
ನಮ್ಮ ಈ ಭಾರಗಳ ಹೊತ್ತು
ಸಾಗಬೇಕಾದವರು ನಾವು
ಸಂಬಂಧಗಳಿರುವುದು
ಭಾರ ಹಂಚಿಕೊಳ್ಳಲು ಮಾತ್ರ
ಮಾಡದಿರೋಣ
ಸಂಬಂಧಗಳನು ನಮ್ಮ ಭಾರ
ಹೊರುವ ಕೂಲಿಯಾಳು || ೩ ||

- ಬುಡ ಬುಡ್ಕಿ ಬಾಬಾ

ಒಳ ರಸ್ತೆ

ಕರ ಕೊಟ್ಟು ನೈಸಾದ ರಸ್ತೆಯಲಿ
ಒಂದೆಡೆಯಿಂದ ಇನ್ನೊಂದೆಡೆಗೆ
ಬೇಗನೆ ತಲುಪಿದ್ದು ಸಾಕು || ೧ ||

ಎಲ್ಲಿಂದ ಆರಂಭವಾಗಿತ್ತೋ
ಅಲ್ಲಿಗೆ ತಿರುತಿರುಗಿ ಬಂದದ್ದು
ಸಾಕು ಆ ವರ್ತುಲ ರಸ್ತೆಯಲಿ || ೨ ||

ಬೇಕಾಗಿದೆ ಒಳ ರಸ್ತೆಗಳ ಪಯಣ
ಒಮ್ಮೆ ಹೊರಟರೆ ಮತ್ತೆಂದೂ
ಮರಳಿ ಬರದ ಕಾಲದ ಪರಿಧಿಯ
ದಾಟಿದ ಆ ಪಯಣ || ೩ ||
- ಬುಡ ಬುಡ್ಕಿ ಬಾಬಾ