ದೀಪಾವಳಿ - ೨೦೧೬

ಸುಂದರ ಸದ್ಗುಣಗಳು ಸೇರೆಯಾಳಾಗಿವೆ
ತಮೋಗುಣಗಳೆಂಬ ನರಕಾಸುರನಿಗೆ
ಪ್ರತಿ ನರಕ ಚತುರ್ದಶಿಗೆ ತಮೋ
ಗುಣಗಳೆಂಬ ನರಕಾಸುರನ ಸಂಹರಿಸಿ
ಸದ್ಗುಣಗಳ ಬಿಡಿಸಿ ಉದ್ಧರಿಸೊ
ನಮ್ಮನೆಲ್ಲ  ಶ್ರೀ ಕೃಷ್ಣ

- ಬುಡ ಬುಡ್ಕಿ ಬಾಬಾ

ಆಕಾಶ ಬುಟ್ಟಿಯ ದೀಪ

(ದೀಪದಂತೆ ಉರಿದು ನಮ್ಮ ಜೀವನಕೆ ಬಣ್ಣ ಬಣ್ಣದ ಬೆಳಕು ಕೊಡುವ ನಮ್ಮ ಭಾರತೀಯ ಸೇನೆಗೆ)

ದೀಪಾವಳಿಯ ರಾತ್ರಿಯಲಿ
ಆಕಾಶ ಬುಟ್ಟಿಯ
ಬಣ್ಣ ಬಣ್ಣದ ಬೆಳಕನ್ನು
ಕಂಡು ಅದನು ಹೊಗಳುವರೆ
ಕೇಳುವವರೇ  ಎಲ್ಲರೂ
ಆದರೆ ಅದರ ಒಳಗಿದ್ದು
ಯಾರಿಗೂ ಕಾಣದೆ
ಉರಿದು ಬಿಸಿಯಾಗಿ ಕಪ್ಪಾಗಿ
ಬೆಳಕ ನೀಡಿದ ಆ ದೀಪವ
ಕಂಡವರಾರು ಕೇಳಿದವರಾರು?
- ಬುಡ ಬುಡ್ಕಿ ಬಾಬಾ

ಬಾಳೊಂದು ಮಹಾಭಾರತ

ಬಾಳೊಂದು ಮಹಾಭಾರತ
ಪ್ರತಿ ದಿನದ ಜೀವನವೇ ಕುರುಕ್ಷೇತ್ರ ಯುದ್ಧ
ಬರೀ ಶತ್ರುಗಳಿಲ್ಲ ರಣರಂಗದಲ್ಲಿ
ಉಂಟು ಇಲ್ಲಿ ಬಂಧು ಮಿತ್ರರೂ ಕೂಡ
ಮಹಾಭಾರತದ ಯುದ್ಧಕ್ಕಿಂತ
ಜೀವನದ ಯುದ್ಧ ಕಠಿಣ || ೧ ||

ಕೌರವರು ಕೌರವರೇ ಆಗಿ ಉಳಿಯರು
ಪಾಂಡವರು ಪಾಂಡವರಾಗೀ ಉಳಿಯರು
ನಡೆದಿದೆ ಪಕ್ಷಗಳ ಬದಲಾವಣೆ ಆಗಾಗ
ಧರ್ಮದ ಧ್ರುವ ನಕ್ಷತ್ರ ಹುಡುಕಿ
ಸರಿಯಾದ ಪಕ್ಷ ಆರಿಸಿದರೆ
ಅರ್ಧ ಯುದ್ಧ ಗೆದ್ದಂತೆ || ೨ ||

- ಬುಡ ಬುಡ್ಕಿ ಬಾಬಾ

ಸಾವು - ಹುಟ್ಟು

ಜೀವನದ ಕಥೆ ಪುಸ್ತಕದಲಿ
ದಿನಗಳೆಂಬ ಹಾಳೆಯಲಿ ಬರೆಯುತಿವೆ
ನಮ್ಮ ಕರ್ಮಗಳು ಕಥೆ ಪ್ರತಿ ಕ್ಷಣ
ಸಾವಲ್ಲ ಈ ಕಥೆಯ ಕೊನೆ
ಅದು ಬರಿ ಅಧ್ಯಾಯದ ಕೊನೆ
ಮುಂದುವರೆಯುವದು ಅದೇ ಕಥೇ
ಹುಟ್ಟೇ೦ಬ  ಹೊಸ ಅಧ್ಯಾಯದಲಿ

- ಬುಡ ಬುಡ್ಕಿ ಬಾಬಾ

ಕರ್ಮಗಳ ಖಾತೆ

ತೆರೆಯಲು ಈ ಖಾತೆ ನಿಲ್ಲ ಬೇಕಿಲ್ಲ ಸಾಲಲ್ಲಿ
ತೆರೆಯಲು ಈ ಖಾತೆ ಬೇಕಿಲ್ಲ ಯಾರ ಶಿಫಾರಸು ಪತ್ರ
ತೆರೆದರೆ ಒಮ್ಮೆ ಈ ಖಾತೆ ಇರುವುದು ಇದು ಸದಾ ಸಕ್ರಿಯ
ಈ ಖಾತೆಯಲಿ ಪ್ರತಿ ತಿಂಗಳು ಲೆಕ್ಕ ಪತ್ರ ಇಡುವ ಜಂಜಾಟವಿಲ್ಲ
ಈ ಖಾತೆಯಲಿ ಕೊನೆ ಪೈಸೆ ವರೆಗೂ ಸದಾ ಲೆಕ್ಕ ಪಕ್ಕಾ
ಸತ್ತರೂ ಮುಚ್ಚದು ಈ ಖಾತೆ
ಜನ್ಮಾಂತರಕ್ಕೂ ಕೂಡ ಯಾವುದೇ ಅರ್ಜಿ ಯಾರ ಮುಲಾಜ ಇಲ್ಲದೆ
ವರ್ಗಾವಣೆ ಆಗುವ ಏಕೈಕ ಖಾತೆ ಇದು
ಅನುಭವಿಸಿ ಮುಗಿಸುವವರೆಗೂ ಸದಾ ನಿಮ್ಮ ಸೇವೆಯಲ್ಲಿ
ಅನವರತ ನಿರತ ನಿಮ್ಮ "ಕರ್ಮಗಳ ಖಾತೆ"

- ಬುಡ ಬುಡ್ಕಿ ಬಾಬಾ

ಅರ್ಧ ಸತ್ಯ

ಸುಳ್ಳು ತಲೆಗೆ ಹೊಡೆದ ಗುಂಡಿನಂತೆ
ಕ್ಷಣ ಮಾತ್ರದಲಿ ಪ್ರಾಣ ತಗೆಯುವುದು
ಅರ್ಧ ಸತ್ಯ ಮಾತ್ರ ಬೆನ್ನಿಗೆ ಚುಚ್ಚಿದ
ಭರ್ಚಿಯಂತೆ ಹನಿ ಹನಿಯಾಗಿ ಕೊಲ್ಲುವುದು
- ಬುಡ ಬುಡ್ಕಿ ಬಾಬಾ

ದಾಳದಾಟ

ಜೀವನ ನಮ್ಮ ಜೊತೆಗೆ ಆಡುವ
ಅತಿ ಭಯಂಕರ ದಾಳದಾಟ
ಅದ್ಯಾವ ನಾಡಲ್ಲಿ
ಅದ್ಯಾವ ಮನೆತನದಲ್ಲಿ
ಅದ್ಯಾವ ತಂದೆ ತಾಯಿಗೆ
ನಾವು ಹುಟ್ಟುತ್ತೇವೋ ಎಂಬುದು
ಆದರೆ ಒಂದೇ ಸಮಾಧಾನ
ಅದು ಈಗಾಗಲೇ ನಡೆದು ಹೋಗಿದೆ

- ಬುಡ ಬುಡ್ಕಿ ಬಾಬಾ

ನೆನಪು

ಕನಸು ಕಂಡು
ಅದೆಷ್ಟೋ ಜತನದಿಂದ ಕಟ್ಟಿ
ತಮ್ಮ ಜೀವನಕೆ  ಸಾಕ್ಷಿಯಾದ
ಸ್ವಂತ ಮನೆಯನ್ನು ತೊರೆದು
ಹೋಗುವವರು
ಮನೆ ತೊರೆಯುವುದು
ದುಡ್ಡಿಗಾಗೋ ?
ಅನುಕೂಲಕ್ಕಾಗೋ?
ಅಥವಾ
ಆ ನೆನಪಿಂದ ದೂರವಾಗಲೋ?

- ಬುಡ ಬುಡ್ಕಿ ಬಾಬಾ

ಅದ್ಯಾಕೋ ಹಿಂಗಪ್ಪಾ?

ರಕ್ತ ಸಂಬಂಧವಲ್ಲದಿದ್ದರೂ ಅದೇ ಸೆಳೆತ ಇದ್ದ ಸಂಬಂಧಗಳೇಕೊ?
ಎಂದು ನೋಡಿರದ ಯಾವುದೋ ಸ್ಥಳಕ್ಕೆ ಜನ್ಮ ಭೂಮಿಯಂತ ಆಕರ್ಷಣೆ ಇದ್ದದ್ದೇಕೋ?
ಚಿರಪರಿಚಿತರಲ್ಲೂ ಇಲ್ಲದ  ಆತ್ಮೀಯತೆ ಹಿಂದೆಂದೂ ಭೇಟಿಯಾಗಿರದ ಮುಂದೆಂದೂ ಭೇಟಿಯಾಗುವ ಭರವಸೆ ಇರದ ಅಪರಿಚಿತರಲ್ಲಿ ಇದ್ದದೇಕೋ?
ಕಂಡು ಕೇಳಿರದ ವ್ಯಕ್ತಿಯ ರಕ್ತ ನಮ್ಮ ದೇಹಕ್ಕೆ ಹೊಂದಿಕೆ ಆಗಿ ಹರಿದದ್ದೇಕೋ ? || ೧ ||

ಈ ಜಗದ ಸೃಷ್ಟಿಯಿಂದ ಇಲ್ಲಿಯವರೆಗೆ
ಮಾತಾಡಿದ ಒಟ್ಟು ಮಾತುಗಳೆಷ್ಟೋ ? ಕೊಟ್ಟ ವಚನಗಳೆಷ್ಟೋ? ಕಲಿತ ಭಾಷೆಗಳೆಷ್ಟೋ?
ಅದೆಷ್ಟೋ ಬಾರಿ ಒಂದಾಗಿ  ಬೇರೆಯಾಗಿ ಮತ್ತ್ತೆ ಒಂದಾಗಿದ್ದು ಎಷ್ಟೋ?
ಅದೆಲ್ಲೋ ಹುಟ್ಟಿ ಅದೆಲ್ಲೋ ಬೆಳೆದು ಅದೆಲ್ಲೋ ಮಡಿದು ಮತ್ತೇನೋ ಆಗಿ ಹುಟ್ಟಿದ್ದೆಷ್ಟೋ?
ದೇಶ ಕಾಲ ದೇಹವೆಂಬ ಪರದೆ ನಮ್ಮಿಂದ ನಮ್ಮನ್ನೇ ಮುಚ್ಚಿಟ್ಟದ್ದೆಷ್ಟೋ? || ೨ ||

- ಬುಡ ಬುಡ್ಕಿ ಬಾಬಾ

ನಗರ ಜೀವನ

ಭಾವ ವೃಕ್ಷಗಳನು ಕಡಿದ
ಭಾವಹೀನತೆಯ ಬಯಲಲ್ಲಿ
ಪ್ರಾಪಂಚಿಕ ಸುಖಕೆ ಹಾತೊರೆಯುವ
ಗಗನ ಚುಂಬಿಗಳಲಿ ನೆಲಸಿ
ವಾಹನ ದಟ್ಟಣೆಯ ನದಿಯಲಿ ಹರಿದು
ಲೋಭದ ಕೆರೆಯಲಿ ತುಂಬಿದ
ಕಾಮ ಕ್ರೋಧ ಮತ್ಸರದ
ನೀರು ಕುಡಿದು
ಮದವೇರಿದ ಸಲಗವಾಗಿ

ಹುಚ್ಚು ಕುದುರೆಯ ನಾಗಾಲೋಟದಂತೆ

ಎಂದು ಸಿಗದ ಮಾಯಾ ಜಿಂಕೆಯ ಹಿಂದೆ
ಓಡುವ ಬದುಕೇ
ನಗರ ಜೀವನ
- ಬುಡ ಬುಡ್ಕಿ ಬಾಬಾ

ಪ್ರತಿಭೆ

 ಪ್ರತಿಭೆ ಅಡಗಿರಬಹುದು
ಅಜ್ಞಾನದ ಪರದೆಯ ಹಿಂದೆ
ತೆರೆದ ಮನದಿಂದ
ನೋಡುತಿದ್ದರೆ ಸುತ್ತಮುತ್ತ
ಸ್ಪೂರ್ತಿಯ ಕೈ ಎಲ್ಲಿಂದಲೂ ಬಂದು
ಪರದೆ ಸರಿಸಿ
ಪ್ರತಿಭೆ ಅನಾವರಣಗೊಳಿಸಬಹುದು
- ಬುಡ ಬುಡ್ಕಿ ಬಾಬಾ