ಓಡಿದೆ ಓಡಿದೆ ಓಡಿದೆ

ಓಡಿದೆ ಓಡಿದೆ ಓಡಿದೆ
ಅರೆ ಘಳಿಗೆ ಕೂಡ ನಿಲ್ಲದೆ ಓಡಿದೆ
ಮೈ ಮನಗಳ ದಣಿವು ಲೆಕ್ಕಿಸದೆ ಓಡಿದೆ
ಕಾಲದ ಪರಿವೆ ಮರೆತು ಓಡಿದೆ
ಹುಟ್ಟಿದೂರು ಹಡೆದವರು
ಹೆಜ್ಜೆಗೆ ಹೆಜ್ಜೆ ಜೋಡಿಸಿ ನಡೆದವರು
ಎಲ್ಲರ ಕಡೆಗಣಿಸಿ ಓಡಿದೆ
ನನ್ನೇ ನಾ ಮರೆತು ಓಡಿದೆ
ಓಡಿದೆ ಓಡಿದೆ ಓಡಿದೆ || ೧ ||


ಓಡುತ್ತಾ ಓಡುತ್ತಾ ಮರೆತೇ ಬಿಟ್ಟೆ
ನಾ ಓಡುವುದು ಏತಕ್ಕಾಗಿ
ಯಾರನ್ನೋ  ಯಾವುದನ್ನೋ
ಹಿಂಬಾಲಿಸಿ ಹಿಡಿಯಲೋ
ಅಥವಾ
ಯಾರಿಂದಲೋ ಯಾವುದರಿಂದಲೋ
ಮರೆಯಾಗಿ ತಪ್ಪಿಸಿಕೊಳ್ಳಲೋ || ೨ ||

ದಿಗಿಲಾಗಿ ನಿಂತೆ  ಅಲ್ಲೇ ಆ ಕ್ಷಣ ನಾ
ಸುತ್ತ ಮುತ್ತ ನೋಡಿದರೆ ಯಾರಿಲ್ಲ
ಗೊತ್ತು ಗುರಿ ಒಂದಿಲ್ಲ
ಆದರೇನು
ಒಳಗಿನ ತಳಮಳ ನಿಂತಿಲ್ಲ
ನಿಂತ ಕ್ಷಣವೊಂದು ಅನಿಸಿತು ಯುಗದಂತೆ
ಪೂರ್ವದಲಿ ಸೂರ್ಯ ಹುಟ್ಟಿಲ್ಲ
ಪಶ್ಚಿಮದಲಿ ಸೂರ್ಯ ಮುಳಗಿಲ್ಲ
ಉತ್ತರ ನನಗೆ ಗೊತ್ತಿಲ್ಲ
ದಕ್ಷಿಣಕೆ ಹೋಗುವ ಮನಸಿಲ್ಲ
ಆದರೂ ನಿಲ್ಲಲಾರೆ ಇನ್ನು ನಿಂತಲ್ಲೇ ನಾ
ಅದಕಾಗೆ ಆದಿ ಕೊನೆಯಿರದ
ಗುರಿಯತ್ತ  ಮತ್ತೆ ನಾ
ಓಡಿದೆ ಓಡಿದೆ ಓಡಿದೆ || ೩ ||
 - ಬುಡ ಬುಡ್ಕಿ ಬಾಬಾ