ರುಚಿಯಾದ ಅಡಿಗೆ

ಏ ರುಚಿಯಾದ ಅಡಿಗೆ ಮಾಡೆ
ಎಂದು ಹೆಂಡತಿಗೆ ಕೇಳಿ ಕೇಳಿ
ಸೋತಿದ್ದೆ || ೧ ||

ಹೆಂಡತಿಯ ಪ್ರೀತಿಯ ಬಂಧುಗಳನ್ನು
ಮನೆಗೆ ಊಟಕ್ಕೆ ಕರೆದು
ಗೆದ್ದು ಬಿಟ್ಟೆ || ೨ ||

- ಬುಡ ಬುಡ್ಕಿ ಬಾಬಾ

ಜನರೆಲ್ಲ ಕೆಟ್ಟವರು ಜಗವೆಲ್ಲ ಕೆಟ್ಟದ್ದು

ಜನರೆಲ್ಲ ಕೆಟ್ಟವರು ಜಗವೆಲ್ಲ ಕೆಟ್ಟದ್ದು
ಅಂತ ಕಾಣಿಸುತ್ತಿದೆಯೆ? || ೧ ||

ಹೌದು ಹೌದು ಹಾಗಾದರೆ ಮೊದಲು
ಬದಲಿಸು ನಿನ್ನ ದೃಷ್ಟಿಕೋನ || ೨ ||

ಸಾಧ್ಯವಿಲ್ಲ ಹಾಗಾದರೆ  ಕಡಿಮೆ ಮಾಡು
ಟೀವೀ ಸೀರಿಯಲ್ ನೋಡುವುದನು || ೪ ||

ಉಹೂ೦ ಇನ್ನೂ ಹಾಗೆ ಇದೆ ಹಾಗಾದರೆ ಮಾಡಿಸಿಕೋ
ಕಾಮಾಲೆ ರೋಗದ ಟೆಸ್ಟ್ || ೫ ||

ಕಾಮಾಲೆಯೂ ಇಲ್ಲವಂತೆ ಹಾಗಾದರೆ ಮಾಡಿಸಿಕೋ
ನಿನ್ನ ತಲೆಯ ಟೆಸ್ಟ್ || ೬ ||

ತಲೆಯೂ ಸರಿಯಾಗಿದೆಯಂತೆ ಹಾಗಾದರೆ ಇನ್ನೂ
ನಾವು ಏನು ಹೇಳೋಣ ಸ್ವಾಮಿ
ನಿಮ್ಮ ಕರ್ಮ ಅನುಭವಿಸಿ ಮಜಾ ಮಾಡಿ || ೭ ||

- ಬುಡ ಬುಡ್ಕಿ ಬಾಬಾ

ಮೌಲ್ಯಗಳ ಪತನ

ಅತಿ  ವೇಗವಾಗಿ
ಕೆಳಗೆ ಬೀಳಲು
ಸರಳ  ದಾರಿ ತನ್ನ
ಮೌಲ್ಯಗಳ  ಪತನ || ೧ ||

ಯಾರು ಒಮ್ಮೆ
ತನ್ನ ಮೌಲ್ಯಗಳ
ಪತನ ಆರಂಭಿಸುತ್ತಾನೋ
ಅವನು

ಇದಕಿಂತ ಇನ್ನೇನೂ

ಹೆಚ್ಚು ಬೀಳಲು
ಸಾಧ್ಯವೇ ಇಲ್ಲ
ಎಂದು ವಿಚಾರ
ಮಾಡುವಷ್ಟರಲ್ಲಿ
ಅದಕಿಂತ
ಕೆಳಗೆ ಬಿದ್ದು
ಹೊಸ ದಾಖಲೆ
ಬರೆದು ಬಿಡುತ್ತಾನೆ  || ೨ ||

- ಬುಡ ಬುಡ್ಕಿ ಬಾಬಾ

ಧೂಳು ಹಾಗೂ ಬೆಳಕು

ಅಂದು ಕೊಂಡೆ ಮನೆಯಲ್ಲಿ ಧೂಳು ಜಾಸ್ತಿ ಎಂದು
ಆದರೆ ಧೂಳಲ್ಲ ಬೆಳಕು ಜಾಸ್ತಿ
ಕಡಿಮೆ ಧೂಳಿದ್ದರೂ ಎದ್ದು ಕಾಣುವುದದು ಬೆಳಕಿಗೆ || ೧ ||

ಬೆಳಕಿನಲ್ಲಿರುವ ಸಾರ್ವಜನಿಕ ವ್ಯಕ್ತಿಗಳಿಗೊಂದು ಪಾಠ
ಧೂಳು ಬೆಳಕಿನ ಆಟದಿಂದ
ಚಿಕ್ಕ ಅವಗುಣವು ದೊಡ್ಡದಾಗಿ ಕಾಣುವುದೆಲ್ಲರಿಗೆ ಹುಶಾರಾಗಿರಿ || ೨ ||

- ಬುಡ ಬುಡ್ಕಿ ಬಾಬಾ

ಹದ (ಶ್ರೀಧರ ಬಳಗಾರ : ಹದ ಕತೆಯ ಭಾವಾನುವಾದ - ಮಯೂರ - ಜೂನ್ - ೨೦೧೬)

ಪ್ರಕೃತಿಯು ಅಡಗಿಸಿದೆ
ಉತ್ಕೃಷ್ಟತೆಯ
ಮೂಲ ದ್ರವ್ಯವನ್ನು
ಅರಿತರೂ ಅರಿಯದಂತೆ ಯಾರಿಗೂ
ಕರೆಯುವರು ಅದನೆ
ಹದವೆಂದು || ೧ ||

ನಳನ ಪಾಕದ ರುಚಿಯಲಿ
ವೈದ್ಯನ ಕೈಗುಣದಲಿ
ಕಮ್ಮಾರನ ಹೊಡೆತದಲಿ
ಕಲಾಕಾರನ ಕಲೆಯಲಿ
ಸಾಹಿತಿಯ ಸಾಹಿತ್ಯದಲಿ
ಆಟಗಾರನ ಆಟದಲಿ
ತಂತ್ರಜ್ಞನ ಯಂತ್ರದಲಿ
ಮುತ್ಸದ್ಧಿಯ ಮಾತಿನಲಿ
ಪ್ರತಿ ಉತ್ಕೃಷ್ಟತೆಯಲಿ
ಅಡಗಿದೆ ಹದ || ೨ ||

ಹದವೆಂಬುದು ಕಲಿಯಲಾಗದು
ಶಾಲೆಯಲಿ ಕಲಿತ ವಿದ್ಯೆಯಂತೆ
ಹದಕಿಲ್ಲ ಸೂತ್ರ ಲೆಕ್ಕಾಚಾರ
ಹದವ ಒಲಿಸಿಕೊಂಡವ
ಕೂಡ ಹೇಳಲಾರ ಕಲಿಸಲಾರ
ಹದವೇನೆಂದು ಯಾರಿಗೂ || ೩ ||


ಪ್ರತಿ ನಿಷ್ಣಾತನ ಕುಶಲತೆ
ಸಂಯಮ ಕಸುಬಿನ ತಲ್ಲೀನತೆಯ
ದಾಟಿ ಉತ್ಕೃಷ್ಟತೆಯ
ಆಭಿವ್ಯಕ್ತಿಗೊಳಿಸುವ ಅವ್ಯಕ್ತ
ಶಕ್ತಿಯೇ ಹದ || ೪ ||

ಹದವರಿಯಬೇಕು
ಅನುಭವಿಸಿ ಮಾಡುವ
ಕೆಲಸದಲಿ ಶ್ರದ್ಧೆ ಜ್ಞಾನ ತುಂಬಿ
ಜೀವಿಸುವ ಪ್ರತಿ ಕ್ಷಣವ
ಅದರ ಧ್ಯಾನದಲೇ ಮುಳುಗಿ
ತಪದಂತೆ ಆಚರಿಸುವ
ಋಷಿಯಾಗಿ ಯೋಗಿಯಾಗಿ || ೫ ||  

- ಬುಡ ಬುಡ್ಕಿ ಬಾಬಾ

ಆಗ - ಈಗ

ಆಗೊಬ್ಬ ಕವಿ:

ಎದೆ ತುಂಬಿ ಹಾಡಿದೆನು ಅಂದು ನಾನು
ಮನವಿಟ್ಟು ಕೇಳಿದಿರಿ ಅಲ್ಲಿ ನೀವು

ಎಲ್ಲ ಕೇಳಲಿ ಎಂದು ನಾನು ಹಾಡುವದಿಲ್ಲ
ಹಾಡುವದು ಅನಿವಾರ್ಯ ಕರ್ಮ ನನಗೆ

ಈಗೊಬ್ಬ ಪ್ರೋಗ್ರಾಮರ್:

FILE ತುಂಬಿ ಬರೆದೆನು CODE ನಾನು
ಮನವಿಟ್ಟು ಮಾಡಿದಿರಿ REVIEW ನೀವು

REVIEW ಮಾಡಲಿ ಎಂದು CODE ಮಾಡುವುದಿಲ್ಲ
CODE ಮಾಡುವದು ಅನಿವಾರ್ಯ ಕರ್ಮ ನನಗೆ

- ಬುಡ ಬುಡ್ಕಿ ಬಾಬಾ

ಪ್ರೀತಿ

ನೀನು ನಾನಾಗುವದು
ನಾನು ನೀನಾಗುವದು
ಅಲ್ಲ ಪ್ರೀತಿ
ನೀನು ನೀನಾಗಿ
ನಾನು ನಾನಾಗಿ
ಇರುವುದೇ ಪ್ರೀತಿ
- ಬುಡ ಬುಡ್ಕಿ ಬಾಬಾ

ಕರಾಗ್ರೇ ಅಲ್ಲ ಮೊಬೈಲ್ ಅಗ್ರೇ

ತಮ್ಮ ಕರಗಿಂತ ಮೊಬೈಲ್ನಲ್ಲಿ  ತಮ್ಮ ಅದೃಷ್ಟ ಕಂಡಾಗ

ಮೊಬೈಲ್ ಅಗ್ರೇ ವಸತೇ whatsapp
ಮೊಬೈಲ್ ಮಧ್ಯೆ facebook
ಮೊಬೈಲ್ ಮೂಲೆ twitter
ಪ್ರಭಾತೇ ಮೊಬೈಲ್ ದರ್ಶನಂ || ೧ ||

ಮೊಬೈಲ್ ಅಗ್ರೇ ವಸತೇ amazon
ಮೊಬೈಲ್ ಮಧ್ಯೆ myntra
ಮೊಬೈಲ್ ಮೂಲೆ flipkart
ಪ್ರಭಾತೇ ಮೊಬೈಲ್ ದರ್ಶನಂ || ೨ ||

- ಬುಡ ಬುಡ್ಕಿ ಬಾಬಾ

ಕ್ಷಮಿಸಲಾಗದು

ಕ್ಷಮಿಸಿಬಿಡಬಹುದು
ಯಾವುದಕ್ಕಾದರೂ
ಮಾಡಿದ
ನಂಬಿಕೆ ದ್ರೋಹವನ್ನು || ೧ ||

ಕ್ಷಮಿಸಿಬಿಡಬಹುದು
ಯಾರನ್ನಾದರೂ || ೨ ||

ಕ್ಷಮಿಸಲಾಗದು
ತನ್ನದೇ ಹಿರಿಮೆಗೆ ಅಳುಕಿ
ಅದನು ಅದುಮುವ
ಹೇಡಿಯನ್ನು || ೩ ||

- ಬುಡ ಬುಡ್ಕಿ ಬಾಬಾ

ಸ್ಪೂರ್ತಿ:
"Anything may be betrayed, anyone may be forgiven. But not those who lack the courage of their own greatness."

• Chapter XVI, p. 720 ; thoughts of Gail Wynand, Fountainhead