ಸದ್ದು ಗದ್ದಲ

ಹೊರಗಿನ ಗಿಜ ಗಿಜ
ಸದ್ದು ಗದ್ದಲ
ಹೆಚ್ಚಾಯಿತು ಎಂದು
ಕಣ್ಣು ಮುಚ್ಚಿದೆ
ಆದರಲ್ಲಿ ಕಂಡ ವಿಚಾರಗಳ
ಕಿಚಪಿಚಕೆ ಬೆದರಿ
ಪಕ್ಕನೆ ಕಣ್ಣು ತೆರೆದು
ಮತ್ತದೇ ಹೊರಗಿನ
ಗೌಜು ಗದ್ದಲದಲ್ಲಿ
ಕಳೆದು ಹೋದೆ

- ಬುಡ ಬುಡ್ಕಿ ಬಾಬಾ

ಪ್ರಶ್ನೆ

ಜೀವನ ಮತ್ತದೇ ಪ್ರಶ್ನೆಯ
ಮರಳಿ ಮರಳಿ ಕೇಳುತಿದೆ
ಎಂದಾದರೆ ಬೇಸರಿಸದೆ
ನೀನು ಆ ಪ್ರಶ್ನೆಗೆ
ಸರಿಯಾಗಿ
ಸಂಪೂರ್ಣವಾಗಿ
ಉತ್ತರಿಸಿರುವೆಯಾ
ವಿಚಾರಿಸಿ ನೋಡು

- ಬುಡ ಬುಡ್ಕಿ ಬಾಬಾ

ಕಲಿ

ಕಲಿಗಾಲವಿದು ಕಲಿಗಾಲ
ಕಲಿ ಕಾದಿಹನು ಮನ
ಕಲಸಿ ವಿಷ ಬೆರೆಸಲು
ವ್ರತ ತಪ ಇಂದ್ರಿಯ
ನಿಗ್ರಹ ಎಲ್ಲ ನಮ್ಮ
ಮಿತಿಯ ಆಚೆಗಿರಬಹುದು
ಕಲಿ ನಿಗ್ರಾಹಕೊಂದು
ರಾಮ ಬಾಣ
ಇಟ್ಟುಕೊಂಡು ಒಂದು
ಗಟ್ಟಿ ಗುರಿ
ನೆಟ್ಟು ದೃಷ್ಟಿ ಅದರಲ್ಲೇ
ಸಂಪೂರ್ಣ
ತಲ್ಲೀನನಾಗುವುದು
- ಬುಡ ಬುಡ್ಕಿ ಬಾಬಾ

ಕಲೆ

ಅಮೂರ್ತ ವಿಚಾರವೊಂದು
ಮೂರ್ತ ರೂಪ
ಪಡೆಯುವುದು
ಬುದ್ಧಿ ಹೃದಯದ
ಸಂಗಮದಿಂದ
ಆ ಸಂಗಮದಲ್ಲಿ
ಬುದ್ಧಿಯ ಕೈ  ಮೇಲಾದರೆ
ವ್ಯಾಪಾರ
ಹೃದಯದ ಕೈ ಮೇಲಾದರೆ
ಕಲೆ
- ಬುಡ ಬುಡ್ಕಿ ಬಾಬಾ

ಮಜಾ ಮಾಡಿ

ಸಾವೇನು ಕೊನೆಯಲ್ಲ ಕರ್ಮ ಫಲಕ್ಕೆ
ಹುಟ್ಟು ಸಾವೆಂಬುದು ಬರೀ
ರಂಗಭೂಮಿಯ ಹಿಂದಿನ ಪರದೆ ಸರಿಸಿದಂತೆ

ದೃಶ್ಯ ವ್ಯಕ್ತಿ ಕಾಲ ದೇಶ ಸಂಬಂಧಗಳ ಬದಲಾವಣೆ

ಕತೆ ಮಾತ್ರ ಅದೇ ಹಳೆಯ ಕಥೆಯ ಮುಂದುವರೆದ ಭಾಗ
ಅನುಭವಿಸಿ ಮುಗಿಸುವರೆಗೂ ಮಜಾ ಮಾಡಿ

- ಬುಡ ಬುಡ್ಕಿ ಬಾಬಾ

ಆ ಕ್ಷಣ

ಯಾರು ಇಷ್ಟ ಪಡದ
ಮುಟ್ಟಿದ್ದನೆಲ್ಲ ಕಪ್ಪು ಮಾಡುವ
ಇಂಗಾಲ ವಜ್ರವಾಗಿದ್ದು
ತಾಪದ ಅತ್ಯುತ್ತ್ಕಟ ಆ ಕ್ಷಣದಲ್ಲಿ
ನಂಬಲು  ಅಸಾಧ್ಯವಾದರೂ ಸತ್ಯ
ಜೀವನ ನಿನ್ನನ್ನು ಗೋಡೆಗೆ
ನೂಕಿ ನಿನ್ನೆರಡು ಕೈಗಳನ್ನು
ಎಳೆದು ತಿರುವಿದ ಆ ಕ್ಷಣವೇ
ನಿನ್ನಲ್ಲಿರುವ ಸೋಲನ್ನು ಒಪ್ಪದ
ವಜ್ರದಂತಹ ಗಟ್ಟಿ ಇರಾದೆಯ
ಹೋರಾಟಗಾರನ ಜನನದ ಕ್ಷಣ

- ಬುಡ ಬುಡ್ಕಿ ಬಾಬಾ

ಸ್ಪೂರ್ತಿ: ಆಮೀರ ಚಿತ್ರ ಯಾ ರೆಹೆಮ ಹಾಡು

ಕಾವ್ಯವಲ್ಲ

ಕಾವ್ಯವಲ್ಲ
ಬರೀ
ಪದಗಳ
ಬೆಸುಗೆ
ಅದು
ಮನದಾಳದ
ಭಾವಗಳ
ಬೆಸುಗೆ || ೧ ||


ಕಾವ್ಯವಲ್ಲ
ಬರೀ
ಒಂದು
ಬರಹ
ಅದು
ಮನದ
ಗಾಯಗಳ
ಮಲಾಮು || ೨ ||

- ಬುಡ ಬುಡ್ಕಿ ಬಾಬಾ

ಅಸ್ಪಷ್ಟ

ಮನವೆಂಬ ಅನಂತ ಸುತ್ತಿನ
ಭದ್ರ ಕೋಟೆಯಲ್ಲಿದೆ
ಭಾವನಾ ಸರೋವರ
ಕೋಟೆಯ ಪ್ರತಿ ಬಾಗಿಲು
ತೆರೆಯಲು ಬೇಕು
ಸಂಬಂಧಗಳೆಂಬ
ಗುರುತಿನ ಚೀಟಿ
ಹುಷಾರಾಗಿ
ಕೊಡಬೇಕು
ಗುರುತಿನ ಚೀಟಿ
ಅರ್ಥ ಪೂರ್ಣ
ಸಂಬಂಧಗಳಿಗೆ ಮಾತ್ರ
ಬರೀ ಹೆಸರಿದ್ದ ಮಾತ್ರಕ್ಕೆ
ಸಂಬಂಧಗಳಿಗೆ
ಕೊಟ್ಟರೆ ಗುರುತಿನ ಚೀಟಿ
ಭಾವನ ಸರೋವರ ಕಲುಕಿ
ಎಬ್ಬಿಸಬಹುದು ಅಲೆ
ಎದ್ದರೆ ಅಲೆ ಆಗಬಹುದು
ಎಲ್ಲ ಅಸ್ಪಷ್ಟ

- ಬುಡ ಬುಡ್ಕಿ ಬಾಬಾ

ಹೆಸರು

ಸಂಬಂಧಗಳು
ಸಂಬಂಧಗಳಾಗುವುದಿಲ್ಲ
ಬರೀ ಸಂಬಂಧಕ್ಕೆ
ಹೆಸರಿದ್ದ  ಮಾತ್ರಕ್ಕೆ  || ೧ ||

ಸಂಬಂಧಗಳ ಅರ್ಥ
ಮಾತ್ರ ಕೊಡಬಲ್ಲದು
ಸಂಬಂಧಕ್ಕೆ
ಹೆಸರು  || ೩ ||

- ಬುಡ ಬುಡ್ಕಿ ಬಾಬಾ

ಬಳ್ಳಿ

ನೆನಪುಗಳ
ಕಾಡಲ್ಲಿ
ಕಳೆದುಕೊಂಡೆ
ಹುಡುಕುತ
ನೆನಪುಗಳ
ಬೆಸೆಯುವ
ಭಾವನೆಗಳ
ಬಳ್ಳಿಗಳ
- ಬುಡ ಬುಡ್ಕಿ ಬಾಬಾ