ಕಲಾಕಾರನ ಸವಾಲು

ಕಲಾಕಾರನ ಸಾಧನೆಯ
ದಾರಿಯ ಅತಿ ದೊಡ್ಡ
ಸವಾಲು ಯಶಸ್ಸಲ್ಲ
ಯಶಸ್ಸನ್ನು ಉಳಿಸಿಕೊಳ್ಳುವದಲ್ಲ
ಆ ಯಶಸ್ಸಿನಿಂದ ತಾನು
ತನ್ನ ಕಲೆಯನ್ನು ಉಳಿಸಿಕೊಂಡು
ಪ್ರಾಮಾಣಿಕನಾಗಿರುವುದು

- ಬುಡ ಬುಡ್ಕಿ ಬಾಬಾ

ಬಾಯಿ ಸತ್ತವ

ಮನೆಯಲಿ ತಪ್ಪು ನಿನ್ನದಾದರೂ ಕೂಡ
ಜವಾಬ್ದಾರಿ ಎಲ್ಲರದು
ಹೊರ ಜಗದಲಿ ತಪ್ಪು ನಿನ್ನದಾದರೆ
ಜವಾಬ್ದಾರಿ ಕೂಡ ನಿನ್ನದು
ನೀನು ಬಾಯಿ ಸತ್ತವನಾಗಿದ್ದರೆ ತಪ್ಪು
ಯಾರದಾದರೂ ಜವಾಬ್ದಾರಿ ನಿನ್ನದು

- ಬುಡ ಬುಡ್ಕಿ ಬಾಬಾ

ಗುಣ - ದೋಷ

ತಮ್ಮ ಆನೆಯಂತ ದೋಷವನ್ನು ಮರೆತು
ಬೇರೆಯವರ ಇರುವೆಯಂತ ದೋಷವನ್ನು
ಆನೆಯಂತೆ ಪ್ರತಿಬಿಬಿಂಬಿಸುವುದು
ಬೇರೆಯವರ ಆನೆಯಂತ ಗುಣವನ್ನು ಮರೆತು
ತಮ್ಮ ಇರುವೆಯಂತ ಗುಣವನ್ನು
ಆನೆಯಂತೆ ಪ್ರತಿಬಿಬಿಂಬಿಸುವುದು
ಕೆಲವರ ಹುಟ್ಟುಗುಣ

- ಬುಡ ಬುಡ್ಕಿ ಬಾಬಾ

ಅಂತರ

ಅವಳೆಂದುಕೊಂಡಳು ಆತ
ಕಟ್ಟಿದರೆ ನನ್ನ ಕನಸಿನ ಗೋಪುರ
ಆಗಬಹುದು ನಾವಿಬ್ಬರು ಹತ್ತಿರ || ೧ ||

ಅವನೆಂದುಕೊಂಡ ಅವಳ
ಕನಸ ನನಸಾಗಿಸಿದರೆ
ಆಗಬಹುದು ನಾವಿಬ್ಬರು ಹತ್ತಿರ || ೨ ||

ಒಂದೊಂದೇ ಇಟ್ಟಿಗೆ ಕೂಡುತ್ತಾ ಹೋದ ಆತ
ಒಂದೊಂದೇ ಇಟ್ಟೆಗೆ ಜೋಡಿಸುತ್ತಾ ಹೋದಳು ಅವಳು || ೩ ||

ಕಾಲದ ಪರಿವೆ ಮರೆತು ಕಟ್ಟಿ ಮುಗಿಸಿದಾಗ
ಗೋಪುರದ ತುದಿ ಚುಂಬಿಸಿತ್ತು ಆಗಸವನ್ನು
ಅವಳಿದ್ದಳು ಗೋಪುರದ ತುದಿಯಲ್ಲಿ
ಆತನಿದ್ದ ಗೋಪುರದ ತಳದಲ್ಲಿ
ಅವರಿಬ್ಬರ ನಡುವಿತ್ತು ಭೂಮ್ಯಾಕಾಶದ
ಅಂತರ || ೪ ||
- ಬುಡ ಬುಡ್ಕಿ ಬಾಬಾ

ಕಾಯುವುದು

ಕೆಲವು ವಿಷಯಗಳೇ ಹಾಗೆ
ಹೇಳಬೇಕೆನಿಸಿದರೂ ಹೇಳಲಾಗದು
ಗೊತ್ತಾದರೂ ಗೊತ್ತಾಗಿದೆಯೆನ್ನಲಾಗದು
ಮೊಗ್ಗು ಹೂವಾಗಿ ಹೂವು ಹಣ್ಣಾಗುವುದಕ್ಕೆ
ಕಾದಂತೆ ಕಾಲದ ಪಕ್ವತೆಗೆ  ಕಾಯಬೇಕು
- ಬುಡ ಬುಡ್ಕಿ ಬಾಬಾ

ಆಸ್ವಾದ

ಕಾವ್ಯ
ಅಸ್ವಾದಿಸಲಾಗದು
ನಮ್ಮ
ತರ್ಕದ
ಗಡಿ ದಾಟಿ
ಕಾವ್ಯದ
ಭಾವದಲಿ
ತಲ್ಲೀನವಾಗದೆ
- ಬುಡ ಬುಡ್ಕಿ ಬಾಬಾ

ಅಧ್ಯಾತ್ಮ ಹಾಗೂ ವಿಜ್ಞಾನ

ಅಧ್ಯಾತ್ಮವನ್ನು ವಿಜ್ಞಾನದ ಹಿನ್ನೆಲೆಯಲಿ
ವಿಜ್ಞಾನವನ್ನು ಆಧ್ಯಾತ್ಮದ ಹಿನ್ನೆಲೆಯಲಿ
ನೋಡುವದಕಿಂತ ದೊಡ್ಡ ದುರಂತ
ಇನ್ನೊಂದಿಲ್ಲ

- ಬುಡ ಬುಡ್ಕಿ ಬಾಬಾ

ಕಾವ್ಯ

ಈ ಕ್ಷಣ ಈ ಸ್ಥಳದಲ್ಲಿ
ಕುಳಿತಲ್ಲೇ ಕುಳಿತು
ಬ್ರಹ್ಮಾಂಡದ ಯಾವುದೋ
ತುದಿ ತಲುಪಿ
ಮನಸಿನಲಿ ಅಡಗಿ
ಇದ್ದು ಇರದಂತಿರುವ
ಭಾವದ ಬಿಂಬವನ್ನು
ಶಬ್ದಗಳ ಪರಿಧಿ ದಾಟಿ
ಶಬ್ದಗಳ ನಡುವಿನ ಅರ್ಥದ
ದರ್ಪಣದಲಿ ಮಾಡುವ
ಅನಾವರಣವೇ
ಕಾವ್ಯ
- ಬುಡ ಬುಡ್ಕಿ ಬಾಬಾ

ಶಬ್ದ ನಿಶ್ಯಬ್ದ

ಅವಳಿಗಳಾಗಿ ಹುಟ್ಟಿ
ಜಗದ ಜಾತ್ರೆಯಲಿ
ಕಳೆದು ಹೋದ
ಶಬ್ದ ನಿಶ್ಯಬ್ದಗಳು
ಮುಖಾಮುಖಿಯಾಗಿದ್ದವು
ಕಳೆದು ಹೋದ ವರುಷಗಳ
ಲೆಕ್ಕ ತಪ್ಪಿದ ನಂತರ || ೧ ||

ಶಬ್ದ ಹೇಳಿ ಕೊಂಡಿತು
ಒಂದು ಉಸಿರಿಗೂ
ಅವಕಾಶ ಕೊಡದೆ
ಅದು ಇದು ಹಾಗೆ ಹೀಗೆ
ತಿಳಿದದ್ದು ಅರ್ಧ ತಿಳಿದದ್ದು
ತಿಳಿಯದರ ಬಗ್ಗೆಯೂ
ಒಂದೆರಡೂ ಸೇರಿಸಿ || ೨ ||

ಅದನೆಲ್ಲ ಅದ್ಯಾವಾಗಲೋ
ಮೀರಿದ್ದ ನಿಶ್ಯಬ್ದ
ಸುಮ್ಮನೆ ಕೇಳೀ
ಕೇವಲ ನಸುನಕ್ಕಿತು
ಆ ಮಿಂಚಿನ ನಸುನಗೆಯ
ಭಾವ ಅರಿತ
ಶಬ್ದ ನಿಶ್ಯಬ್ದವಾಯಿತು || ೩ ||

- ಬುಡ ಬುಡ್ಕಿ ಬಾಬಾ

ಅಮ್ಮ ಹಾಗೂ ಹೆಂಡತಿ

ಅಮ್ಮ ಹಾಗೂ ಹೆಂಡತಿ
ಬಡಿಸುವ ರೀತಿಯಲ್ಲಿ
ವ್ಯತ್ಯಾಸ ಬಲು ಅಲ್ಪ || ೧ ||

ಅಮ್ಮ ಬಡಿಸುವಳು
'ಬೇ'ಕೇ 'ಬೇ'ಕೇ
ಅನ್ನುತ್ತಾ
ಹೆಂಡತಿ ಬಡಿಸುವಳು
'ಸಾ'ಕೇ 'ಸಾ'ಕೇ
ಅನ್ನುತ್ತಾ || ೨ ||

ತಪ್ಪು ತಿಳಿಯದಿರಿ
ಅಮ್ಮನಿಗೆ ಮಗ
ಸೊರಗುವ ಚಿಂತೆ
ಹೆಂಡತಿಗೆ ಗಂಡ
ದಪ್ಪನಾಗುವ ಚಿಂತೆ || ೩ ||
- ಬುಡ ಬುಡ್ಕಿ ಬಾಬಾ

ಹೊಸ ಅಧ್ಯಾಯ

ಆ ಹಳೇ ಕಟ್ಟಡವ
ಒಡೆದು
ಧರಾಷಾಯಿಯಾಗಿಸಿದ್ದರು
ಅದರ ಅವಶೇಷಗಳನು
ಆಗಲೇ ಸಾಗಿಸಾಗಿತ್ತು
ಬಿದ್ದಿದ್ದವು ಎಷ್ಟೋ
ವರ್ಷ ಆಸರೆಯಾಗಿದ್ದ
ಉಕ್ಕಿನ ಸರಳುಗಳು
ಅಸ್ಥಿ ಪಂಜರದಂತೆ
ಅನಾಥವಾಗಿ
ಮುಗಿದು ಹೋಗಿತ್ತು
ಇತಿಹಾಸದ ಅಧ್ಯಾಯವೊಂದು
ಅಲ್ಲೇ ಆಡುತಿತ್ತು
ಕೂಲಿಕಾರರ ಕೂಸೊಂದೂ
ಹೊಸ ಅಧ್ಯಾಯದ
ಮೊದಲ ಪುಟದಂತೆ
- ಬುಡ ಬುಡ್ಕಿ ಬಾಬಾ

ಬದಲಾವಣೆ

ಕೇವಲ ಬಾಹ್ಯ ಬದಲಾವಣೆಯಿಂದ
ಆಂತರಿಕ ಬದಲಾವಣೆ ಸಾಧ್ಯವೇ?
ಆಂತರಿಕ ಬದಲಾವಣೆಯಾದಾಗ
ಅದರ ಬಾಹ್ಯ ತೋರ್ಪಡಿಕೆ ತಪ್ಪೇ?
- ಬುಡ ಬುಡ್ಕಿ ಬಾಬಾ

ಅಪೂರ್ಣತೆ

ಅಪೂರ್ಣತೆಯೂ ಒಂದು ಕಲೆ
ಹೇಳು ಹೇಳುತ್ತಲೆ ಸುಮ್ಮನಾಗಿಬಿಡುವುದು
ಚಲನ ಚಿತ್ರ ಇನ್ನೂ ಬಾಕಿ ಎಂದೆನಿಸುವಾಗ ಮುಗಿದುಬಿಡುವುದು
ಇನ್ನೂ ಮುಂದೇನು ಎಂದು ನಡೆಯುವಾಗ ದಾರಿ ಕೊನೆಯಾಗುವುದು
ಜೀವನ ಎಂದೂ ಮುಗಿಯದು ಅಂದುಕೊಳ್ಳುತ್ತಲೇ
- ಬುಡ ಬುಡ್ಕಿ ಬಾಬಾ

ಸ್ಪೂರ್ತಿ: http://vikaeksta.com/index.php?/pages/bio/

ಸಾರ್ಥಕ ಪ್ರೀತಿ

ನಾನಲ್ಲ ಪರಿಪೂರ್ಣ
ನೀನಲ್ಲ ಪರಿಪೂರ್ಣ
ನಾನು ನೀನು ಕೂಡಿ
ಒಬ್ಬರ ನ್ಯೂನತೆಗಳಿಗೆ
ಇನ್ನೊಬ್ಬರ ಶಕ್ತಿಯ
ಆಸರೆ ಕೊಟ್ಟರೆ
ಆಗಬಹುದೇನೋ
ನಮ್ಮಿಬ್ಬರ ಜೀವನ
ಪರಿಪೂರ್ಣ
ಆಗಬಹುದೇನೋ
ನನ್ನ ನೀನ್ನ
ಪ್ರೀತಿ ಸಾರ್ಥಕ
- ಬುಡ ಬುಡ್ಕಿ ಬಾಬಾ

ಹದಿ ಹರೆಯ

ಹದಿ ಹರೆಯ
ತುಂಬಿತ್ತು
ಸಾವಿರಾರು
ಕನಸುಗಳಿಂದ
ಪ್ರತಿ ಕನಸು
ಗಾಢ ಬಣ್ಣಗಳ
ಓಕುಳಿ ಹಬ್ಬದಂತಿತ್ತು || ೧ ||

ಅದರ ಮುಗ್ಧತೆಯಲಿ
ಅಡಗಿತ್ತು
ಜಗದಲ್ಲೆಲ್ಲ ಬರಿ
ಸೌಂದರ್ಯವನ್ನೇ
ತೋರುವ
ಅಧ್ಭುತ್ ಮಾಂತ್ರಿಕತೆ || ೨ ||

ಎಲ್ಲ ಸಾಧ್ಯತೆಗಳಿಗೂ
ಧುಮ್ಮಿಕ್ಕುವ
ಜಲಪಾತದಂತೆ
ಮುಕ್ತವಾಗಿ
ನುಗ್ಗುವ
ಉತ್ಸಾಹವಿತ್ತು || ೩ ||

ಕಗ್ಗತ್ತಲು ಕ್ಷಣ
ಮಾತ್ರವೂ ಇರಲಿಲ್ಲ
ಕತ್ತಲಿದ್ದಾಗೂ
ದೀಪಾವಳಿಯ
ಹಬ್ಬದ ದೀಪದಂತ
ಪ್ರಭೆ ಸುತ್ತಲೂ
ಅವರಿಸಿರುತಿತ್ತು || ೪ ||

ಅಸಾಧ್ಯ ಎಂಬುದು
ಇದೆ ಎಂದೇ
ಅನಿಸಿರಲಿಲ್ಲ
ಕಾಲದ ಜೋಳಿಗೆಯಲ್ಲಿ
ಅಡಗಿದೆ
ತನಗೆ ಬೇಕಾದದೆಲ್ಲ
ಎಂಬ ಅದಮ್ಯ
ವಿಶ್ವಾಸವಿತ್ತು || ೫ ||

- ಬುಡ ಬುಡ್ಕಿ ಬಾಬಾ

ಮಂತ್ರ ಮುಗ್ಧ

ಅದೆಂತಹದೊ ಧ್ವನಿ ಕೇಳಿತು
ನೋಡಿದರಾರಿಲ್ಲಾ ಸುತ್ತಲೂ ಯಾರು
ಆದರೂ ಅದೇಕೋ ಭಯವಿಲ್ಲ
ಅದರಲಿತ್ತು ಆಪ್ತತೆ ಚಿರಪರಚಿತ ಧ್ವನಿಯಂತೆ
ಅಂತರಂಗವ ತಟ್ಟಿ ಮನದಲಿ ಅನುರಣಿಸಿ
ಅದೆಲ್ಲಿಂದೋ ಬಂದು ಕರೆಯಿತು
ನಡೆ ಇನ್ನೂ ಸಾಕು ಹೊರಡೋಣ ಎಂದು
ಇದ್ದುದೆಲ್ಲವ ಬಿಟ್ಟು ನಡೆದು ಬಿಟ್ಟೆ
ಬಂದಿತ್ತದು ಕಾಲದ ಎಲ್ಲ ಪರಿಧಿಯ ದಾಟಿ
ತನಗಾಗಿಯೇ ಅದ್ಯಾವುದೋ ಜನ್ಮದಲ್ಲಿ
ತಾನೇ ಬಿಟ್ಟ ಕರೆಯಂತೆ ಕೈ ಹಿಡಿದು
ಕರೆದುಕೊಂಡು ಹೊರಟುಬಿಟ್ಟಿತು
ನಾ ಹಿಂಬಾಲಿಸಿದ್ದೆ ಮಂತ್ರ ಮುಗ್ಧನಾಗಿ
- ಬುಡ ಬುಡ್ಕಿ ಬಾಬಾ

ದಾರಿ ತಪ್ಪಿದವರ ದಾರಿ

ಮುಗುಳ್ನಗೆ ಸುಳ್ಳು
ಪರಿಚಯ ಸುಳ್ಳು
ಬಣ್ಣ ತುಂಬಿದ್ದರೂ
ಏಕಾಂಗಿ ಎಲ್ಲರೂ
ದಾರಿ ತಪ್ಪಿದವರ
ದಾರಿ ಇದು

- ಬುಡ ಬುಡ್ಕಿ ಬಾಬಾ

ಹಿಂದಿ ತಲಾಶ  ಚಿತ್ರದ ಮುಸ್ಕಾನೆ ಝೂಟಿ ಪಲ್ಲವಿಯ ಅನುವಾದ

ಹೋರಾಟ ಹಾರಾಟ

ಕಾಣದ ಸರಪಳಿಗಳು
ಬಂಧಿಸಿವೆ ಕನಸುಗಳನ್ನು
ಸುತ್ತಲೂ ಕವಿದ
ಗಾಢಂಧಕಾರಕ್ಕೆ
ಕಣ್ಣಿದ್ದೂ ಕುರುಡು || ೧ ||

ಗಾಳಿಯ ಕಣ ಕಣ
ಕೂಡಿಸಿ ಒಂದೊಂದೇ
ಉಸಿರೆಳೆಯುತ್ತಾ
ಸಾಗಿದೆ ಪಯಣ
ಹರಿಯುವ ನೀರಿಗೆ
ವಿರುದ್ಧವಾಗಿ || ೨ ||

ಸಾಗಿ ಬಂದ
ದಾರಿಯಲ್ಲಿಲ್ಲ
ಸಿಹಿ ತಾಣಗಳು
ಹಿಂತಿರುಗಿ
ನೋಡುವುದು
ಸಾಧ್ಯತೆಯೇ ಅಲ್ಲ || ೩ ||


ಗಾಳಿಯ ಜೊತೆ
ಹೋರಾಡುತ್ತಾ
ಅಂಧಕಾರವನ್ನು
ತಡೆದಿರುವ
ದೂರದಲ್ಲಿರುವ
ಮಿಣುಕು ದೀಪವೇ
ಸಂಗಾತಿ ಹಾಗೂ ಸ್ಪೂರ್ತಿ || ೪ ||

ನಿಲ್ಲದಿರಲಿ ಪಯಣ
ತುಂಬಿರಲಿ ಕಾಲಲ್ಲಿ
ನಿರಂತರ ಶಕ್ತಿ
ಮನಸಲ್ಲಿ ಸದಾ
ಉಕ್ಕುವ ಉತ್ಸಾಹ
ರಟ್ಟೆಯಲ್ಲಿ ಬಲ
ನುಗ್ಗುವ ಛಲ  || ೫ ||

ಇದೇನು
ಕತೆಯ ಕೊನೆಯೊ
ಹೊಸ ಕತೆಯ
ಆರಂಭವೋ
ಇದೇನು
ದಿನದ ಕೊನೆಯೊ
ಹೊಸ ದಿನದ
ಆರಂಭವೋ  || ೬ ||

ಸಾಧ್ಯವಿಲ್ಲ ಇನ್ನೂ
ಈ ಹಾರಾಟವನ್ನು
ತಡೆಯಲು
ಹಳೆಯದಕೆಲ್ಲ ಬೀಳ್ಕೊಡುಗೆ
ಕೊಟ್ಟು
ಆರಂಭವಾಗಲಿ
ಹೊಸ ಹೋರಾಟ ಹಾರಾಟ || ೭ ||

- ಬುಡ ಬುಡ್ಕಿ ಬಾಬಾ

ಸ್ಪೂರ್ತಿ: ಹಿಂದಿ ಚಲನ ಚಿತ್ರ ಉಡಾನ