ಗುರಿ ಇರಲಿ

ಗುರಿ ಇರಲಿ ಗುರಿ ಇರಲಿ
ಜೀವನಕೊಂದು ಗುರಿ ಇರಲಿ
ದೊಡ್ಡದೋ ಚಿಕ್ಕದೋ
ಸಮೀಪದ್ದೋ ದೂರದ್ದೋ
ಮನ ಮೆಚ್ಚುವ ಒಂದು
ಗುರಿ ಇರಲಿ || ೧ ||

ಜಗದಲಿದೆ ಒಂದಕಿಂತ ಒಂದು
ಮನ ಮೆಚ್ಚುವ ಗುರಿಗಳು
ಒಂದಾರಿಸಿಕೊಂಡ ಮೇಲೆ
ಮತ್ತೊಂದಕ್ಕೆ ಮನ
ಹಾತೊರೆಯುವಂತೆ ಮಾಡುವ
ಆಕರ್ಷಕ ಗುರಿಗಳು || ೨ ||

ನೋಡು ಅತ್ತಿತ್ತ ತಪ್ಪೇನಿಲ್ಲ
ವಿನಿಯೋಗಿಸು ಕೆಲ ಸಮಯ
ನಿನಗಿಷ್ಟವಾದ ಗುರಿಗಳಲಿ
ಬದಲಾಯಿಸು ನಿನ್ನ ಗುರಿ
ಅದೇ ನಿನ್ನ ಆಂತರಿಕ
ಕರೆಯಾಗಿದ್ದರೆ || ೩ ||

ಹೊಸ ಗುರಿಯ ಆಕರ್ಷಣೆ
ಬಹು ಬೇಗ ಕುಂದಿದರೂ
ಒಳ್ಳೆಯದೇ ಆಯಿತು
ಆಯ್ದು ಪೂರಕ ವಿಷಯಗಳ
ಮರೆಯದೆ  ಮರಳು
ಮತ್ತೆ  ನೀ ನಿನ್ನ
ಮುಖ್ಯ ಗುರಿಯ ದಾರಿಗೆ || ೪ ||
- ಬುಡ ಬುಡ್ಕಿ ಬಾಬಾ

ಹಣೆಬರಹ

ನಿನ್ನೆಲ್ಲ ಪ್ರಯತ್ನದ
ನಂತರವೂ
ನಿನಗಿಷ್ಟವಾದದ್ದು
ಸಿಗದಿರಬಹುದು
ಸಿಕ್ಕದ್ದು ಬಹು ಕಾಲ
ಉಳಿಯದಿರಬಹುದು || ೧ ||

ಆದರೇನಂತೆ ಎಲ್ಲ ನಡೆದಿದೆ
ನಮ್ಮ ಹಣೆಬರಹದಂತೆ
ನಮಗರಿವಿಲ್ಲದೆಯೆ
ಕರೆದುಕೊಂಡು ಹೊರಟಿದೆ
ನಾವು ಮುಟ್ಟಬೇಕಾದ
ನಮಗೆ  ದಕ್ಕಬೇಕಾದ
ಅತ್ಯುನ್ನತ್ತ ಸ್ಥಾನದತ್ತ || ೨ ||

ಅಚಲ ನಂಬಿಕೆಯಿಂದ
ದಣಿಯದೆ ಕೊರಗದೆ
ಕೊನೆಯುಸಿರಿರುವವರೆಗೆ
ನಿರಂತರ ನಮ್ಮ ಪಾತ್ರ
ಉತ್ಕೃಷ್ಟವಾಗಿ ಮನ:
ಸಾಕ್ಷಿ ಮೆಚ್ಚುವಂತೆ
ನಿಭಾಯಿಸುವುದಷ್ಟೆ
ನಮ್ಮ ಕೆಲಸ || ೩ ||
- ಬುಡ ಬುಡ್ಕಿ ಬಾಬಾ

ಹಪಾ ಹಪಿ

ತನಗೆ ತಾನೇ ಯಾರೆಂದು
ತಿಳಿಯದಿದ್ದರೂ ಕೂಡ
ಅದೋ ಇದೋ
ಏನೋ ಒಂದು
ಆಗುವ
ಹಪಾ ಹಪಿ
ಸದಾ ಕಾಲ
ಸರಿಯೋ ತಪ್ಪೋ
ನಿಲ್ಲಲಂತೂ ಆಗದು
ಆದರೂ
ಬಂಗಾರದ ಗಣಿಯ
ಅದಿರಿನಲ್ಲಿ
ಕೆಲ ಅಂಶ ಬಂಗಾರ
ಅಡಗಿರುವಂತೆ
ನಮ್ಮತನ ತೋರುವದು ನಾವು
ಮಾಡುವ ಪ್ರತಿ ಕೆಲಸದಲ್ಲಿ
ಕೆಲ ಅಂಶವಾಗಿಯಾದರೂ
ಏನಾದರೂ ಆಗುವದು
ಬರಿ ದಾರಿ ಮಾತ್ರ
ಗುರಿ ಮಾತ್ರ
ಅಂಶ ಅಂಶವಾಗಿ
ತನ್ನ ತಾನು
ಅರಿಯುವದಾಗಿರಲಿ
- ಬುಡ ಬುಡ್ಕಿ ಬಾಬಾ

ದಮ್ಮಯ್ಯ ಬಿಟ್ಟು ಬಿಡಿ

ಬಾಳೊಂದು ಹೋರಾಟ
ಹೋರಾಟಗಾರರು ನಾವೆಲ್ಲ
ಹೋರಾಟವೆಂದ ಮೇಲೆ
ಹರಿಯುವುದು ನದಿಯಾಗಿ
ರಕ್ತ ಕಣ್ಣೀರು
ಹೋರಾಟದ ಕೊನೆಗೆ
ಸಾವು ಖಚಿತ || ೧ ||

ಇದನರಿತು ಕೂಡ
ಬಂಧಿಸದಿರಿ ಮಕ್ಕಳ
ಕನಸುಗಳನ್ನು ದಮ್ಮಯ್ಯ
ಬಿಟ್ಟು ಬಿಡಿ
ಹಾರಲು ಅವನು
ನೀಲಾಕಾಶದಲಿ || ೨ ||

ಬಿಟ್ಟು ಬಿಡಿ
ಅವರೇ ಆಯ್ದುಕೊಳ್ಳಲಿ
ತಮ್ಮ ಹೋರಾಟವನ್ನು
ದಮ್ಮಯ್ಯ ಬಂಧಿಸದಿರಿ
ಅವರನು ಬರಿ
ಹೊಟ್ಟೆಪಾಡಿನ ಗೊಟಕ್ಕೆ || ೩ ||

ಜೀತದಾಳಾಗಿ ದುಡಿದರೇನು
ಬಂತು ಸಂತೃಪ್ತಿ
ಗಳಿಸಿದ ಸಂಪತ್ತನ್ನು
ಅನುಭವಿಸಲು ಆಗದೆ
ಸತ್ತಂತೆ ಜೀವಿಸುವ
ಜೀವಂತ ಶವವಾಗಿಸುವ
ಬದಲು ದಮ್ಮಯ್ಯ
ಬಿಟ್ಟು ಬಿಡಿ || ೪ ||

ಹೋರಾಡಲಿ ಮಕ್ಕಳು
ಅವರು ಆಯ್ದ
ಹೋರಾಟವನ್ನು ಮನ
ಬಿಚ್ಚಿ ವೀರಾವೇಶದಿಂದ
ಹೊಟ್ಟೆ ತುಂಬದೆ
ಸತ್ತರೆ ಸಾಯಲಿ
ಬಿಡಿ ಸಿಗುವುದು
ಸಾವಲ್ಲೂ ಸಂತೃಪ್ತಿ || ೫ ||

ದಮ್ಮಯ್ಯ ಬಿಟ್ಟು
ಬಿಡಿ ನೀವು
ಕಂಡ  ಸೀಮಿತ
ಜೇವನವನ್ನೇ  ಏಕೆ
ಮಾಡುತಿರುವಿರಿ
ಜೀವನದ ಪರಿಭಾಷೆ
ದಮ್ಮಯ್ಯ ಬಿಟ್ಟು
ಬಿಡಿ ಮಕ್ಕಳ
ಕನಸುಗಳನು ಹಾರಲಿ
ಅವು ನೀಲಾಕಾಶದಲ್ಲಿ || ೬ ||
- ಬುಡ ಬುಡ್ಕಿ ಬಾಬಾ

ಗಾಳಿಗಿಂತ ಹಗುರ

ಕೇಳ್ರಪ್ಪೊ ಕೇಳ್ರಿ
ಗಾಳಿಗಿಂತ ಹಗುರವಾದ ಮತ್ತೊಂದು
ಹೊಸ ವಸ್ತುವಿನ ಆವಿಷ್ಕಾರವಾಗಿದೆಯಂತೆ
ಅದು ಕೆಲವರ ಮಾತಂತೆ
ಮಾತು ಗಾಳಿಗಿಂತ ಹಗುರ ಮಾಡುವುದು
ಅತಿ ಸುಲಭವಂತೆ || ೧ ||

ಆಡಿದ ಮಾತಿಗೆ  ಮಾಡುವ ಕೃತಿಗೆ
ಯಾವುದೇ ಸಂಬಂಧವಿಟ್ಟುಕೊಳ್ಳದೆ
ಆಡುವುದೊಂದು ಮಾಡುವುದೊಂದು
ಮಾಡಿ ಮಾಡಿ  ಮಾತನ್ನು
ಗಾಳಿಗಿಂತ ಹಗುರ
ಮಾಡಬಹುದಂತೆ || ೨ ||

ಇನ್ನೂ ಬಲುನೂಗಳಿಗೆ ಇದನೆ
ತುಂಬಿ ಹಾರಿ ಬಿಡುವ ಹೊಸ
ಬಲೂನು ಭಾಗ್ಯ  ಯೋಜನೆ
ಕೂಡ ಇದೆಯಂತೆ
ಆಸಕ್ತಿ ಇರುವವವರು ಕೂಡಲೇ
ನೋಂದಣೆ ಮಾಡಿಕೊಂಡು
ಭಾಗವಹಿಸಬೇಕಂತೆ || ೩ ||
- ಬುಡ ಬುಡ್ಕಿ ಬಾಬಾ

ಕವಿತೆ

ಅದೊಂದು ಸಂಜೆ ಆಕಾಶ
ಮೋಡಗಳು ಪಕ್ಷಿಗಳು
ಉದಯಿಸುತ್ತಿರುವ ಚಂದ್ರ
ಇವೆಲ್ಲವನು ಪದಗಳಲ್ಲಿ ಹಿಡಿದು
ಕವಿತೆ ಮಾಡಲು ತಿಣುಕುತ್ತಿದೆ
ಆದ ಕಂಡು ನಸು ನಕ್ಕು
ಆಕಾಶ ನುಡಿಯಿತು ಅಯ್ಯೋ
ಮಂಕೇ ಮೊದಲು ಮನ ತೆರೆದು
ನಮ್ಮನ್ನು ಕಂಡು ಆನಂದಿಸಿ
ಅನುಭವಿಸುವದನು ಕಲೆ
ಕವಿತೆ ತಾನಾಗೇ ಬರುತ್ತೆ

- ಬುಡ ಬುಡ್ಕಿ ಬಾಬಾ

ಅವಿವಾಹಿತ ಪ್ರಶ್ನೆಗಳು

ಎಲ್ಲ ಪ್ರಶ್ನೆಗಳು
ಉತ್ತರವನ್ನು
ಮದುವೆಯಾಗಿ
ಸುಖವಾಗಿ
ಇದ್ದು
ಬಿಡಲು
ಇಚ್ಚಿಸುವದಿಲ್ಲ
ಕೆಲ ಪ್ರಶ್ನೆಗಳು
ಉತ್ತರವಿಲ್ಲದೆ
ಯಾವಾಗಲೂ
ಕಾಡುತ್ತಾ
ಏಕಾಂಗಿಯಾಗಿ
ಇದ್ದು
ಸ್ವಾರಸ್ಯವನ್ನು
ಕಾದು
ಕೊಂಡಿರುತ್ತವೆ
- ಬುಡ ಬುಡ್ಕಿ ಬಾಬಾ

ಮಾಯಾಬಜಾರು

ಎಚ್ಚರಿಕೆ
ಮನಸೊಂದು
ಮಾಯಾಬಜಾರು
ಮಹಾ
ಮಾಯಾಬಜಾರು || ೧ ||

ಭೂತಕಾಲದ ನೆನಪುಗಳ
ತಿರುಚಿ
ಸಿಹಿ ನೆನಪನ್ನು ಕಹಿ
ಕಹಿ ನೆನಪನ್ನು ಸಿಹಿ
ಮಾಡುವುದು || ೨ ||

ಭವಿಷ್ಯದ ಬಗ್ಗೆ
ಹುಸಿಯಾದ
ಭರವಸೆಯಲ್ಲಿ ಭಯ
ಭಯದಲ್ಲಿ ಭರವಸೆ
ಬಿತ್ತುವುದು || ೩ ||

ಮರೆಯದಿರಿ
ಭೂತಕಾಲದ ಮಾಸಿದ
ನೆನಪುಗಳಲಿ ಸತ್ತ್ವವಿಲ್ಲ
ಭವಿಷ್ಯದ ಬಣ್ಣ ಬಣ್ಣದ
ಕನಸುಗಳಲಿ ಸತ್ಯವಿಲ್ಲ || ೪ ||

ಸತ್ತ್ವ ತುಂಬಿದ ಸತ್ಯ
ಈ ಕ್ಷಣವೊಂದೇ
ಈ ಉಸಿರೊಂದೇ
ಮತ್ತೆಲ್ಲ ಬರಿ
ಮಾಯಾ ಬಜಾರು
ಮಹಾ
ಮಾಯಾಬಜಾರು || ೫ ||
- ಬುಡ ಬುಡ್ಕಿ ಬಾಬಾ

ಗುರುತೇ೦ಬ ಅಚ್ಚು

ಗುರುತೇ೦ಬುದಲ್ಲ
ಸರೋವರದಲ್ಲಿ
ನಿಂತ ನೀರು
ಅದು
ಅನಂತ ಸಮುದ್ರದತ್ತ
ಹರಿಯುವ ನದಿ || ೧ ||

ಗುರುತೇ೦ಬುದಲ್ಲ
ಆಳವಾಗಿ ಬೇರೂರಿ
ನಿಂತ ಮರ
ಅದು
ದಿಗಂತದತ್ತ ಮುಖಮಾಡಿ
ಹಾರುವ ಹಕ್ಕಿ || ೨ ||

ಅದೆಂತಹ ಮಾಯೆ
ಅದು
ತನ್ನ ಕೈಯಿಂದಲೇ
ರೂಪಿಸಿದ
ಗುರುತೇ೦ಬ  ಅಚ್ಚು
ಈಗ ಬಂಧಿಸಿದೆ ತನ್ನನ್ನೇ  || ೩ ||

- ಬುಡ ಬುಡ್ಕಿ ಬಾಬಾ

ಶ್ರೀಮಂತಿಕೆ

ಶ್ರೀಮಂತಿಕೆ ಚೆನ್ನ
ಎರಡು ಮಾತಿಲ್ಲ
ಆದರೆ
ಶ್ರೀಮಂತಿಕೆ  ನಾವು
ಮಾಡಿಕೊಂಡ
ಹೊಂದಾಣಿಕೆಗಿಂತ
ಮಾಡಿದ
ಕೊಡುಗೆಯ
ಸಾಧನೆಯ
ಪ್ರತೀಕವಾದರೇ
ಇನ್ನೂ ಚೆನ್ನ
ಅಲ್ಲ್ವಾ?
- ಬುಡ ಬುಡ್ಕಿ ಬಾಬಾ

ಬಾಹ್ಯಾಂತರ

ಮನುಜನ
ಬಾಹ್ಯಾಂತರದ
ಮೌಲ್ಯಗಳ
ಅಂತರ
ಹೆಚ್ಚಾದಂತೆ
ಘರ್ಷಣೆ  ಹೆಚ್ಚು
ಬಾಳ ಬಂಡಿಯಲಿ
ಪಯಣ ಕಠಿಣ
ಗುರಿ ತಲುಪುವುದು
ಅನಿಶ್ಚಿತ
ಹೇಗೋ ಮಾಡಿ
ಸುತ್ತಿ ಬಳಸಿ
ತಲುಪಿದರೂ
ಸೇರುವುದು
ತಪ್ಪು ಗುರಿ
ಮಾಡಿದೆಲ್ಲಾ
ಹೊಳೆಯಲ್ಲಿ
ಹುಣಸೆ ತೊಳೆದಂತೆ
- ಬುಡ ಬುಡ್ಕಿ ಬಾಬಾ

ಶಿಥಿಲತೆ

ಮಾಡಿದ ತಪ್ಪನ್ನೇ ಮತ್ತೆ ಮತ್ತೆ ಮಾಡಿದಾಗ
ಮೊದಲಾಗುವದು ಬೇಸರ
ಬೇಸರ ಹೆಚ್ಚಾದಾಗ ಬರುವುದು ಸಿಟ್ಟು
ಸಿಟ್ಟೆಲ್ಲ ಕೂಡಿ ಆಗುವದು ಜಗಳ
ಜಗಳವೇ ಜೀವನವಾದಾಗ ತುಂಬುವದು ಹೇಸಿಗೆ
ಹೇಸಿಗೆ ತರಿಸುವದು ಅನಾಸಕ್ತಿ
ಅನಾಸಕ್ತಿಯೇ ಸಂಭಂದದ ಶಿಥಿಲತೆಯ ಆರಂಭ

- ಬುಡ ಬುಡ್ಕಿ ಬಾಬಾ

ಆದರ್ಶ

ಆದರ್ಶ ವ್ಯಕ್ತಿಗಳನ್ನು
ಗೌರವಿಸುವದು
ಅವರ ಆದರ್ಶಕ್ಕಿಂತ
ಹೆಚ್ಚಾಗಿ ಅವರು
ಅವರಾಗಿ ಉಳಿದದಕ್ಕೆ || ೧ ||

ಅವರು ಅವರಾಗಿ
ಉಳಿಯದಿದ್ದರೆ
ನಾವು ನಾವಾಗುವುದಕ್ಕೆ
ಸ್ಪೂರ್ತಿ
ಸಿಗುತ್ತಿರಲಿಲ್ಲ || ೨ ||

- ಬುಡ ಬುಡ್ಕಿ ಬಾಬಾ

ಗುಣ

ಗುಲಾಬಿ ಗಿಡದಲ್ಲಿ
ಮುಳ್ಳುಗಳೂ ಇವೆ
ಎಂದ ಮಾತ್ರಕ್ಕೆ
ಗುಲಾಬಿ ಹೂವನ್ನು
ಕಡೆಗಣಿಸಲಾರದು || ೧ ||

ಅವರಲ್ಲಿ
ಅವಗುಣಗಳೂ ಇವೆ
ಎಂದ ಮಾತ್ರಕ್ಕೆ
ಅವರ ಗುಣಗಳನ್ನು
ಕಡೆಗಣಿಸಲಾರದು || ೨ ||

- ಬುಡ ಬುಡ್ಕಿ ಬಾಬಾ