ಬುದ್ಧಿ ಮಾತು

ಪ್ರತಿ ಓದಿದ ಕೇಳಿದ ಬುದ್ಧಿ ಮಾತು
ಬೆಲೆ ಕಟ್ಟಲಾಗದ ವಜ್ರವೇನೋ
ಎಂಬಂತೆ ಅವನ್ನು ಅಷ್ಟಿಷ್ಟು
ಅಳವಡಿಸಿಕೊಳ್ಳಲು ಯತ್ನಿಸಿ
ಕೆಲವೊಮ್ಮೆ ಭೇಷ ಅನಿಸಿಕೊಂಡು
ಕೆಲವೊಮ್ಮೆ ಕ್ಷಮಿಸಿ ಏನೆಂದು ಕೇಳಬೇಡಿ
ಒಟ್ಟು ಹೇಳಲಾಗದ್ದನ್ನು ಅನಿಸಿಕೊಂಡು
ಅದೆಷ್ಟೋ ವರ್ಷಗಳು ಕಳೆದು ಹೋದವು || ೧ ||

ಬೆಳೆದಂತೆ ತಿಳಿಯಿತು
ಬುದ್ಧಿ ಮಾತುಗಳಿಗೇನು ಕಮ್ಮಿಯಿಲ್ಲ
ತರಕಾರಿ ಮಾರುಕಟ್ಟೆಯ ಕಾಯಿ ಪಲ್ಯದಂತೆ
ಸಿಗುತ್ತವೆ ಅವೆಲ್ಲ ಕಡೆ ಎಂದು
ಸಿಕ್ಕಿದೆ ಎಂದು ಸಿಕ್ಕದ್ದನು ತಿಂದರೇ
ಜೀರ್ಣಿಸಿಕೊಳ್ಳಲಾಗದು ಎಂದು
ಅರಿಯುವುದು  ಸುಲಭವಾಗಿರಲಿಲ್ಲ || ೨ ||

ಬರೀ ಬುದ್ಧಿ ಮಾತು ಹೇಳುವರು ಹಲವರು
ಆದರೆ ಪ್ರತಿ ಬುದ್ಧಿ ಮಾತು ಬರೀ ದಾರದ ನೂಲು
ಅದಲ್ಲ ಚಳಿಗಾಲಕೆ  ನಡುಗುತಿರುವ
ಜೀವಕ್ಕೆ ಬೇಕಾದ ಬೆಚ್ಚನೆ ಬಟ್ಟೆ
ನೂಲಿಲ್ಲದೆ ಬಟ್ಟೆ ಇಲ್ಲ ಸರಿ ಆದರೆ
ಬರೀ ನೂಲೆ ಬಟ್ಟೆ ಅಲ್ಲ
ಸಿಕ್ಕ ನೂಲನ್ನು ಆರಿಸಿ ಸರಿಯಾಗಿ ಜೋಡಿಸಿ
ಜೀವನ ಮಗ್ಗದಲಿ ಎಳೆದು ಎಳೆದು ಗಟ್ಟಿ ಮಾಡಿ
ಬೆಚ್ಚನೆ ಬಟ್ಟೆ ಮಾಡುವುದು
ಹೇಳಿ ಕೊಡುವರು ಯಾರು? || ೩ ||

 - ಬುಡ ಬುಡ್ಕಿ ಬಾಬಾ

ಯಶಸ್ಸು

ಬರೀ ಯಶಸ್ಸಿನ
ಹಿಂದೆ  ಓಡುವುದರ
ಅಪಾಯವೆಂದರೆ
ಅದು  ಸಿಕ್ಕ ಮೇಲೆ
ಜೀವನದಲ್ಲಿ ಮುಂದೇನು
ಎನ್ನುವ ಖಾಲಿತನ
ಯಶಸ್ಸು ನೀ ಜೀವನದಲಿ
ಪ್ರೀತಿಸುವ ಕೆಲಸ
ಮಾಡುತ್ತಿರುವಾಗ
ಬಾಳೆ ಗೂನೇ
ಜೊತೆ ಬರುವ
ಬಾಳೆ ಎಲೆಯಂತೆ
ಬಂದರೆ ಚೆನ್ನ
 - ಬುಡ ಬುಡ್ಕಿ ಬಾಬಾ

ಶಾಪ

ಈ ಜಗದ
ರೀತಿ ನೀತಿಗಳೇ
ಬಲು ವಿಚಿತ್ರ
ಇದ್ದರೂ ಇದು
ಸದಾ ಕಾಲ
ತಿಳಿಯದಿದ್ದಾಗ
ಕಾಣುತ್ತಿರಲಿಲ್ಲಾ
ಒಮ್ಮೆ ತಿಳಿದ ಮೇಲೆ
ಬೇಡವೆಂದರೂ
ಇರಲಾಗದು
ಕಾಣದೆ

 - ಬುಡ ಬುಡ್ಕಿ ಬಾಬಾ