ಚಿಂವ ಚಿಂವ ಗುಬ್ಬಿ

ಮಾನವರು ಧ್ಯಾನಿಸಿದ್ದರು ತಮ್ಮ ಹೊಸ ಧ್ಯೇಯವಾಕ್ಯ
ಜೀವನವಾಗಬೇಕು ಒಂದು ವ್ಯವಹಾರ
ಜೀವನದ ಪ್ರತಿ ಕ್ಷಣವಾಗಬೇಕು ಸಂಕಲನ ವ್ಯವಕಲನ
ಜೀವಪ್ರೀತಿ ಜೀವನಪ್ರೀತಿಗಿರಕೂಡದು ವ್ಯವಧಾನ
ಆದ ಕೇಳಿ ಪ್ರತಿಭಟಿಸಿತು ಗುಬ್ಬಿಯೊಂದು ಚಿಂವ ಚಿಂವ ಎಂದು || ೧ ||

ಕೆರಳಿದರು ಮಾನವರು ಕೆಂಡವಾಯಿತು ಅವರ ಬುದ್ದಿ
ಮೊಳಗಿತು ಘೋಷವಾಕ್ಯವೊಂದು ಕಟ್ಟಿ ಕೋಟೆಯ
ಬಗ್ಗು ಬಡೆಯಿರಿ ಈ ಜೀವಪ್ರೀತಿಯ ಗುಬ್ಬಿಗಳ
ತಲೆ ಎತ್ತಿದವು ಮೊಬೈಲ್ ಟವರ್ಗಳೆಂಬ ಬುರುಜುಗಳು
ನಿಸ್ತಂತು ಬೇಲಿಯ ಬೆಸೆದು ಹೊಸೆದರು ಗುಬ್ಬಿಗಳ ಸಂಕುಲವನ್ನೇ || ೨ ||

ಘಂಟಾ ಘೋಷವಾಗಿ ಮೊಳಗಿತು ಮತ್ತದೇ ಧ್ಯೇಯವಾಕ್ಯ
ಜೀವನವಾಗಬೇಕು ಒಂದು ವ್ಯವಹಾರ
ಜೀವನದ ಪ್ರತಿ ಕ್ಷಣವಾಗಬೇಕು ಸಂಕಲನ ವ್ಯವಕಲನ
ಜೀವಪ್ರೀತಿ ಜೀವನಪ್ರೀತಿಗಿರಕೂಡದು ವ್ಯವಧಾನ
ಇದ  ಕೇಳಿ ಎಲ್ಲಡೆ ನೆಲಸಿತ್ತು ಸಾವಿನ ಮನೆಯ ಮೌನ || ೩ ||

ಆ  ಮೌನವ ಸೀಳಿದ ಕರ್ಕಶ  ರಿಂಗ್  ಟೂನುಗಳ ಮಧ್ಯೆ
ಸ್ವಾಗ್‌ತೀಸಿ ಸ್ವೀಕರಿಸಿದರು ಹೊಸ ಧ್ಯೇಯವಾಕ್ಯ
ಅಂದಿಂದ ಮತ್ತೆ ಹಿಂದೆ ನೋಡಿಲ್ಲ ಇತಿಹಾಸದ ಕಡೆಗೆ

ಕಟ್ಟುತ್ತಲೇ ಸಾಗಿದೆ ಮಾನವ ಜನಾಂಗ ತನ್ನ ಜೀವನ ಸೌಧವ
ಜೀವಪ್ರೀತಿಯ ಸಂಕೇತವಾದ ಗುಬ್ಬಿಯ ಸಮಾಧಿ ಮೇಲೆ || ೪ ||

- ಬುಡ ಬುಡ್ಕಿ ಬಾಬಾ