ದೀರ್ಘ ರಜೆಯ
ನಂತರದ
ಎಲ್ಲರ ಪ್ರಶ್ನೆ
ಏನು ಮಾಡಿದೆ
ರಜದಲಿ ಎಂದು || ೧ ||
ಹೇಗೆ ಹೇಳಲಿ
ಏನು ಮಾಡಿದೆ
ದೀರ್ಘ ರಜೆಯಲಿ
ಎಂದು || ೨ ||
ಹೇಳಲಾದಿತೆ
ಕುಳಿತಿದ್ದೆ
ಘಂಟೆಗಟ್ಟಲೆ
ಒಂದು ನಿಮಿಷ ಕೂಡ
ವಿರಮಿಸಿದ
ತುಂಟ
ಮಗುವಿನಂತಿರುವ
ಮನಸಿನ
ಜೊತೆಗೆ
ಸುಮ್ಮನೆ
ಎಂದು || ೩ ||
ಹೇಳಲಾದಿತೆ
ಮಲಗಿದ್ದೆ
ಕಣ್ಣು ಮುಚ್ಚಿ
ಭಾವನಾ ಸಮುದ್ರದ
ದಡದಲ್ಲಿ
ಅಪ್ಪಳಿಸುವ
ಅಲೆಗಳ
ಶಬ್ದ ಕೇಳುತ್ತಾ
ತೋಯುತ್ತಾ
ಎಂದು || ೪ ||
ಹೇಳಲಾದಿತೆ
ಹತ್ತಿದ್ದೆ
ಅನುಭವಗಳ
ಬೆಟ್ಟವನ್ನು
ನೋಡಲು
ಜೀವನದ
ಒಟ್ಟು ಭಾವಗಳ
ದೃಶ್ಯವನ್ನು
ಎಂದು || ೫ ||
ಛೆ! ಹೀಗೆಲ್ಲ ಹೇಳಲಾಗದು
ನಕ್ಕಾರು ಎಲ್ಲರೂ
ಪಟ್ಟಿ ಮಾಡಿದೆ ಕೆಲ
ಪ್ರಸಿದ್ಧ ಪ್ರವಾಸಿ ಸ್ಥಳಗಳ
ಹೇಳಿದೆ ಹೋಗಿದ್ದೆ ಅಲ್ಲಿ ಎಂದು
ಅದ ಕೇಳಿ ಕಣ್ಣರಳಿಸಿ
ಎಲ್ಲರೆಂದರು
ವಾಹ ! ವಾಹ !
ಎಂದು || ೬ ||
ರಜೆಯೆಂಬುದಿಲ್ಲ ಚಟುವಟಿಕೆಯ ಮನಸ್ಸಿಗೆ - ಸುಂದರ ಕವನ.
ReplyDeleteಧನ್ಯವಾದಗಳು ಸರ್
Delete