ಉದ್ಯಮವೊಂದು ಗಾಳಿಪಟ

ಉದ್ಯಮವೊಂದು ಗಾಳಿಪಟ ಹಾರಿಸಿದಂತೆ
ಮೊದಲು ಬಂಡವಾಳ ಹೂಡಿ
ಗಾಳಿಪಟ ದಾರ ಖರೀದಿಸಬೇಕು
ಉತ್ಪನ್ನವೆಂಬ ಸೂತ್ರ ಹಾಕಿ
ಬೇಡಿಕೆಯ ಗಾಳಿಗೆ ಕಾಯಬೇಕು
ತಾಳ್ಮೆ ಕಳೆದುಕೊಳ್ಳದೆ ಕಾಯಬೇಕು  || ೧ ||

ಗಾಳಿ ಬೀಸುವ ದಿಕ್ಕು ಬಲವರಿತು
ಗಾಳಿಪಟದ ಸೂತ್ರ ಬಾಲ ಸರಿಪಡಿಸಿದಂತೆ
ಉತ್ಪನ್ನವ ಸಂಸ್ಕರಿಸಿ ಮಾರ್ಪಡಿಸಬೇಕು
ಸಮಯಕ್ಕೆ ಸರಿಯಾಗಿ ತಯಾರಾದರೆ
ಬೇಡಿಕೆಯ ಗಾಳಿಗೆ ತೂರಿಕೊಂಡು
ಹಾರಬಹುದು ಅದು ನೀಲಿ ಬಾನಲ್ಲಿ || ೨ ||

ಗಾಳಿಗೆ ತಕ್ಕಂತೆ ಬಿಡಲು
ದಾರವೆಂಬ ಬಂಡವಾಳ ತುಂಬಿರಬೇಕು
ಮೇಲೇರಿದಂತೆಲ್ಲಾ ಪ್ರತಿಸ್ಪರ್ಧಿಗಳ ಸ್ಪರ್ಧಿಸಬೇಕು
ಸ್ಪರ್ಧೆಯಲ್ಲಿ ದಾರ ತುಂಡರಿಸಿಬಹುದು
ಬೇಡಿಕೆಯ ಗಾಳಿ ಹೋಗಿ
ಗಾಳಿಪಟ ಗೋತಾ ಹೊಡೆದು ನೆಲಕಚ್ಚಬಹುದು || ೩ ||

ಮಾರುಕಟ್ಟೆಯಲ್ಲಿ ಕುಸಿತದ ಮಳೆ ಬಂದಾಗ
ಗಾಳಿಪಟ ಎಳೆದು ಕೆಳಗಿಸಬೇಕು
ಏರಿದಾಗ ಬಿಟ್ಟ ದಾರ
ಕೆಳೆಗಿಳದಾಗ ಗಂಟಾಗಿ ಗೋಜಲಾಗಬಹುದು
ಗಂಟು ಬಿಡಿಸಿ ಮತ್ತೆ ಸುತ್ತಿಡಬೇಕು
ತಯಾರಾಗಬೇಕು ಮತ್ತದೇ ಸಾಹಸಕ್ಕೆ || ೪ ||

ಕನಸಲ್ಲೂ ಕಾಣದನ್ನು ಪಡೆಯಬಹುದು
ಪಡೆದುದ ಎಲ್ಲ ಕಳೆದುಕೊಳ್ಳಲುಬಹುದು
ಆನಂದದ ಪರ್ವತದ ತುತ್ತುದಿ
ದು:ಖದ ಪ್ರಪಾತದ ತಳ
ಸದಾ ಸಿದ್ಧವಿರಬೇಕು ಎರಡಕ್ಕೂ
ಆಗಲೇ ಅನುಭವಿಸಬಹುದು ರೋಮಾಂಚನವನ್ನು || ೫ ||
- ಬುಡ ಬುಡ್ಕಿ ಬಾಬಾ