ಅಂತರ

ಅವಳೆಂದುಕೊಂಡಳು ಆತ
ಕಟ್ಟಿದರೆ ನನ್ನ ಕನಸಿನ ಗೋಪುರ
ಆಗಬಹುದು ನಾವಿಬ್ಬರು ಹತ್ತಿರ || ೧ ||

ಅವನೆಂದುಕೊಂಡ ಅವಳ
ಕನಸ ನನಸಾಗಿಸಿದರೆ
ಆಗಬಹುದು ನಾವಿಬ್ಬರು ಹತ್ತಿರ || ೨ ||

ಒಂದೊಂದೇ ಇಟ್ಟಿಗೆ ಕೂಡುತ್ತಾ ಹೋದ ಆತ
ಒಂದೊಂದೇ ಇಟ್ಟೆಗೆ ಜೋಡಿಸುತ್ತಾ ಹೋದಳು ಅವಳು || ೩ ||

ಕಾಲದ ಪರಿವೆ ಮರೆತು ಕಟ್ಟಿ ಮುಗಿಸಿದಾಗ
ಗೋಪುರದ ತುದಿ ಚುಂಬಿಸಿತ್ತು ಆಗಸವನ್ನು
ಅವಳಿದ್ದಳು ಗೋಪುರದ ತುದಿಯಲ್ಲಿ
ಆತನಿದ್ದ ಗೋಪುರದ ತಳದಲ್ಲಿ
ಅವರಿಬ್ಬರ ನಡುವಿತ್ತು ಭೂಮ್ಯಾಕಾಶದ
ಅಂತರ || ೪ ||
- ಬುಡ ಬುಡ್ಕಿ ಬಾಬಾ