ಈ ಯುದ್ಧ

ಈ ಯುದ್ಧವಲ್ಲ ಕೇವಲ ಗಂಟೆ ದಿನಗಳದು
ಸಾಲದು ತೋರಿದರೆ ಶೌರ್ಯ
ಆಗೊಮ್ಮೆ ಈಗೊಮ್ಮೆ
ಇಲ್ಲಿ ನಿರ್ಣಾಯಕವಲ್ಲ ಗೆಲುವು ಸೋಲುಗಳು
ಕ್ಷಣಿಕ ಅವೆಲ್ಲ
ನಿರಂತರ ಸತ್ಯ ಒಂದೇ
ಇದೊಂದು ವಿರಾಮ ಕೊನೆಯಿರದ ಯುದ್ಧ || ೧ ||

ಶತ್ರುಗಳು ಯಾರೆಂದು ತಿಳಿಯದು ಇಲ್ಲಿ
ಇಲ್ಲಿ ಯಾರೂ ಸದಾ ಶತ್ರುಗಳಲ್ಲ
ಇಲ್ಲಿ ಯಾರೂ ಸದಾ ಮಿತ್ರರಲ್ಲ
ಮಿತ್ರರಲ್ಲಿ ಶತ್ರುಗಳು
ಶತ್ರುಗಳಲ್ಲಿ ಮಿತ್ರರು ಅಡಗಿಹರು
ಅದ ಕಾಣಲು ಸದಾ ತೆರೆದಿರಬೇಕು ಅರಿವಿನ ಒಳಗಣ್ಣು
ಸದಾ ಮಸೆಯುತಿದ್ದರೂ ಮನದ ಕತ್ತಿ
ಯುದ್ಧದ ಏಕತಾನತೆಗೆ
ಕಳೆದು ಹೋಗುವುದು ಮನದ ಹರಿತ
ಉಡುಗಿ ಹೋಗುವುದು ಕೈ ಕಾಲಿನ ಬಲ || ೨ ||

ಈ ಕ್ಷಣಕ್ಕಾಗೇ ಕಾದವರಂತೆ ಎರಗುವರು
ಕಾಣದ ಶತ್ರು ಸೈನ್ಯದ ಆಕ್ರಮಣಕಾರರು
ಪ್ರತಿ ಆಕ್ರಮಣಕ್ಕೂ ಕೊಡಲಾಗದು
ಪ್ರತೀಕಾರದ ಉತ್ತರ
ತಿಳಿದು ಅರಿತು ಆಯ್ಕೆ ಮಾಡಬೇಕಿದೆ
ಕಾದಡಾಲೇ ಬೇಕಾದ ಯುದ್ಧಗಳ
ಕೆಲವೊಮ್ಮೆ ಓಡಿ ಹೋಗಿ ಅವಿತು
ಕೆಲವೊಮ್ಮೆ ಗೆದ್ದು ಸೋತು
ಕೆಲವೊಮ್ಮೆ ಸೋತು ಗೆದ್ದು
ಎಲ್ಲ ಕಳೆದುಕೊಂಡರೂ ಸೈ
ಎದುರಿಸಬೇಕಿದೆ ಕಳೆದುಕೊಳ್ಳದೆ
ಮನದ ಸ್ಥಿಮಿತ ಸ್ಥೈರ್ಯ ಭರವಸೆ  || ೩ ||

ಮತ್ತೆ ಮತ್ತೆ ಕಾದಾಡಿ
ಮನದಟ್ಟು ಮಾಡಿಕೊಳ್ಳಬೇಕಿದೆ
ಈ ಯುದ್ಧವಲ್ಲ ಗಂಟೆ ದಿನಗಳದು
ಈ ಯುದ್ದಕ್ಕಿಲ್ಲ ಸೋಲು ಗೆಲುವಿನ ಪರಿಣಾಮ
ಈ ಯುದ್ಧ ಬಿಡುವುದೇ ಸೋಲು
ಈ ಯುದ್ಧವಾಡುತ್ತಿರುವುದೇ ಗೆಲುವು  ಎಂದು|| ೪ ||
 - ಬುಡ ಬುಡ್ಕಿ ಬಾಬಾ