ನಗರಗಳೆಂಬ ಯಂತ್ರ

ನಗರಗಾಳಿಗಿವೆ ಕರಾರುವಾಕ್ಕಾಗಿ ನಡೆಯುವ ಯಂತ್ರದಂತೆ
ಇದಕೆ ಮಾನವರಲ್ಲ ಯಂತ್ರ ನಡೆಯುತ್ತಿರಲು
ಬೇಕಾಗಿವೆ ಕೆಲಸಗಾರರೆಂಬ ಬಿಡಿ ಭಾಗಗಳು || ೧ ||

ಬಿಡಿ ಭಾಗಗಳ ಜೀವನಕಿಲ್ಲ ಇಲ್ಲಿ ಬೆಲೆ
ಏನಿದ್ದರೂ ನಡೆಯುತ್ತಿರಬೇಕು ಯಂತ್ರ
ಯಂತ್ರಕ್ಕಾಗಿ ಮಾನವರೋ ಮಾನವರಿಗಾಗಿ ಯಂತ್ರವೋ
ಏನೋ ಒಂದು ಒಟ್ಟಿನಲಿ ತಿರುಗುತಿರಬೇಕು ಚಕ್ರ || ೨ ||

ಬಹು ಮಹಡಿ ಕಟ್ಟಡಗಳೆಂಬ ಗೋದಾಮಿನಲಿ
ಸಂಗ್ರಹಿಸಿಡುತ್ತಾರೆ ಈ ಬಿಡಿ ಭಾಗಗಳನ್ನು
ನಡೆಯುತ್ತಿರಲು ಈ ಯಂತ್ರ ಮತ್ತು
ನಾಳೆ ಬೇಕಾಗುವ ಬಿಡಿ ಭಾಗಗಳ ಉತ್ಪಾದಿಸಲೆಂದು || ೩ ||

- ಬುಡ ಬುಡ್ಕಿ ಬಾಬಾ