ಎಲ್ಲಿದೆ ಆನಂದ?

ಅದೇನೋ ಹೇಳ್ತಾರಪ್ಪ  ಆನಂದ
ಅನ್ನೋದು ಅಡಗಿದೆ ನಮ್ಮೊಳಗೆ ಅಂತ
ಹುಡುಕ ಹೋಗಬೇಡಿ
ಹೊರಗೆಲ್ಲೂ ಅಂತ ಗೊತ್ತಿಲ್ಲ್ಲ
ಇದು ಖರೇನೋ ಸುಳ್ಳೋ ಅಂತ || ೧ ||

ಯಾವುದಕ್ಕೂ ಕಲಿತು ಬಿಡಿ
ಒಳ್ಳೆ ಶಾಲಾ ಕಾಲೇಜುಗಳಲ್ಲಿ
ಪಡೆದು ಬಿಡಿ ಉತ್ತಮ ಅಂಕಗಳನ್ನ
ನೋಡಿಬಿಡಿ ಅದರಲ್ಲೇನಾದರೂ
ಅಡಗಿದೆಯಾ ಆನಂದ ಅಂತ || ೨ ||

ಯಾವುದಕ್ಕೂ ಸೇರಿಬಿಡಿ ಕೆಲಸಕ್ಕೆ
ಉತ್ತಮ ಸಂಬಳ ಭಡ್ತಿ ಕೊಡುವ
ಸಂಸ್ಥೆಗಳಲ್ಲಿ ಆಗಿ ಬಿಡಿ ಸಿರಿವಂತ
ನೋಡಿಬಿಡಿ ಅದರಲ್ಲೇನಾದರೂ
ಅಡಗಿದೆಯಾ ಆನಂದ ಅಂತ || ೩ ||

ಯಾವುದಕ್ಕೂ ಆಗಿಬಿಡಿ ಮದುವೆ
ಕಟ್ಟಿಕೊಳ್ಳಿ ನಿಮ್ಮದೇ ಮನೆ
ಮಾಡಿಕೊಳ್ಳಿ ಮಕ್ಕಳ
ನೋಡಿಬಿಡಿ ಅದರಲ್ಲೇನಾದರೂ
ಅಡಗಿದೆಯಾ ಆನಂದ ಅಂತ || ೪ ||

ಯಾವುದಕ್ಕೂ ಸುತ್ತಿ ಬಿಡಿ ಜಗವೆಲ್ಲ
ಅನುಭವಿಸಿ ಬಿಡಿ ಸುಖಗಳ
ಮಾಡಿಬಿಡಿ ನಿಮಗನಿಸಿದ ಮಜಾ
ನೋಡಿಬಿಡಿ ಅದರಲ್ಲೇನಾದರೂ
ಅಡಗಿದೆಯಾ ಆನಂದ ಅಂತ || ೫ ||

ಯಾವುದಕ್ಕೂ ಮಾಡಿಬಿಡಿ ನಿಮ್ಮಿಷ್ಟದ
ಕೆಲಸ ನಿಮ್ಮೆಲ್ಲಾ ಪ್ರತಿಭೆ ಬಳಸಿ
ಸಮಾಜಕ್ಕೆ ಒಂದು ಕೊಡುಗೆಯಾಗಿ
ನೋಡಿಬಿಡಿ ಅದರಲ್ಲೇನಾದರೂ
ಅಡಗಿದೆಯಾ ಆನಂದ ಅಂತ || ೫ ||

ಯಾವುದಕ್ಕೂ ಮಾಡಿಬಿಡಿ ತೀರ್ಥಯಾತ್ರೆ
ಜಪ ತಪ ಪೂಜೆ ಸಾಧನೆ
ಆಧ್ಯಾತ್ಮ ಅಧ್ಯಯನ ಮಂಥನಗಳ
ನೋಡಿಬಿಡಿ ಅದರಲ್ಲೇನಾದರೂ
ಅಡಗಿದೆಯಾ ಆನಂದ ಅಂತ || ೫ ||

ಇಷ್ಟೆಲ್ಲ ಮಾಡಿದ ಮೇಲೂ ಆನಂದ ಸಿಗಲಿಲ್ಲ
ಅಂದ್ರೆ ಒಮ್ಮೆ ಹುಡುಕಿ ನೋಡಿಬಿಡಿ
ನಿಮ್ಮಲ್ಲೇ ಎಲ್ಲಾದರೂ ಅಡಗಿದೆಯಾ ಅಂತ
ಸಿಕ್ಕರೆ ಸರಿ ಸಿಗಿದಿದ್ದರೂ ಮಾಡಬೇಕಾದದೆಲ್ಲಾ
ಮಾಡಿಯಾಯಿತಲ್ಲ ಅಂತ ಅನಂದವಾಗಿರಿ || ೬ ||
- ಬುಡ ಬುಡ್ಕಿ ಬಾಬಾ